త్వరలోనే రాష్ట్ర వ్యాప్త బంద్​కు పిలుపు: సీపీఐ రామకృష్ణ

ఏపీకి ప్రత్యేక హోదా ఇవ్వకపోగా.. ప్రత్యేక ద్రోహం మాత్రం చేస్తున్నారని సీపీఐ రాష్ట్ర కార్యదర్శి రామకృష్ణ ఆగ్రహం వ్యక్తం చేశారు. మోదీ అధికారంలోకి వచ్చిన ఆరున్నర సంవత్సరాల కాలంలో రాష్ట్రానికి ఏ చిన్న ప్రయోజనం చేకూరలేదని విశాఖ సీపీఐ కార్యాలయంలో ఆయన వ్యాఖ్యానించారు. విశాఖ ఉక్కును ప్రైవేట్ పరం చేయాలన్న కేంద్రం నిర్ణయాన్ని అందరూ ముక్త కంఠంతో వ్యతిరేకిస్తున్నారని తెలిపారు.

విశాఖ స్టీల్ ప్లాంట్ ప్రైవేటీకరణపై పోరాటంలో భాగంగా.. త్వరలోనే రాష్ట్ర వ్యాప్త బంద్​కు పిలుపునిస్తున్నట్టు సీపీఐ రాష్ట్ర కార్యదర్శి రామకృష్ణ ప్రకటించారు. హైదరాబాద్​లో సంఘీభావ సమావేశం నిర్వహిస్తున్నట్టు చెప్పారు. స్టీల్ ప్లాంట్ ప్రైవేటీకరణను భాజపా ప్రభుత్వం పాలసీగా పెట్టుకుందని ఆరోపించారు.

దిల్లీకి వెళ్లిన భాజపా నేతలు స్టీల్​ ప్లాంట్​ను రక్షించుకున్నాకే తిరిగి రావాలని డిమాండ్ చేశారు. సీఎం జగన్​ ఉత్తరం రాస్తే సరిపోదని, అఖిలపక్షం ఏర్పాటు చేసి, అదరినీ దిల్లీ తీసుకెళ్లి పోరాటం చేయాలని సూచించారు. విశాఖ ఉక్కు ప్రైవేటీకరణకు వ్యతిరేకంగా రాష్ట్ర అసెంబ్లీలో తీర్మానం చేయాలన్న ఆయన.. ఎంపీలు అంతా కలిసి రాజీనామాలు చేయాలని డిమాండ్ చేశారు.

ఇవీ చూడండి: