Visakha Money Change Fraud: రెండు వేల రూపాయలకు బదులుగా నోట్లను మార్పిడి చేసి 500 రూపాయలు ఇస్తామని చెప్పి.. సుమారు 12 లక్షల రూపాయలకు టోకరా వేసిన ఘటన విశాఖలో జరిగింది. నోట్లు మార్పిడి చేసుకుంటే కమిషన్ కూడా వస్తుందంటూ నమ్మబలికి మూకుమ్మడి మోసానికి తెర లేపారు. రెండు వేల రూపాయలు తీసుకుని వాటి స్థానంలో నల్ల కాగితాలు ఇచ్చి.. నగదుతో పరారయ్యారు
బాధితుని కథనం ప్రకారం.. శ్రీకాకుళం జిల్లా రావాడ గ్రామానికి చెందిన కెల్లా సురేష్ అనే వ్యక్తికి.. తూర్పు గోదావరి జిల్లాకు చెందిన గంగాభవానీ అనే మహిళ పరిచయమైంది. ఈ నేపథ్యంలో ఆమె కేరళకు చెందిన బంగారం వ్యాపారం చేసే వ్యక్తులు తనకు తెలుసని సురేష్కు చెప్పింది. వారికి ఓ ట్రస్ట్ర్ కూడా ఉందని వివరించింది. వారికి 2 వేల రూపాయల నోట్లు ఇస్తే.. బదులుగా 500 రూపాయల నగదు ఇస్తారని తెలిపింది. అలా మార్పిడి చేసినందుకు 10 శాతం కమీషన్ కూడా చెల్లిస్తారని నమ్మబలికింది. మార్పిడి చేసిన నగదుతో పాటు కమీషన్ను రూపాయలు మొత్తం కలిపి 13.20 లక్షల రూపాయలు వెంటనే బ్యాంకు ఖాతాలో జమ చేస్తారని పేర్కొంది.
నిజమని నమ్మిన సురేష్ శనివారం శ్రీకాకుళం నుంచి ద్విచక్ర వాహనంపై 12 లక్షల రూపాయలు విశాఖకు తీసుకుని వచ్చాడు. విశాఖ నగరంలో ఆర్అండ్బీ ప్రాంతంలో గంగాభవానీ సురేష్కు కలిసింది. ఈ క్రమంలో ఆమె నోట్లు మార్పిడి చేస్తాడంటూ కృష్ణ అనే వ్యక్తిని సురేష్కు పరిచయం చేసింది. దీంతో సురేష్ డబ్బును నల్లని పాలిథీన్ కవర్లో పెట్టి కృష్ణకు ఇచ్చాడు. కృష్ణ వెంటనే ఆ నగదు ఓ బ్యాగ్లో పెట్టాడు. అనంతరం కేరళకు చెందిన వ్యక్తులు సమీపంలోని రెస్టారెంట్లో ఉన్నారని అక్కడే డబ్బులు ఇస్తారని రెస్టారెంట్కు సురేష్ను తీసుకుని వెళ్లాడు. అక్కడ ఇద్దరు వ్యక్తుల్ని పరిచయం చేసి వీరే కేరళకు చెందిన వారని చెప్పాడు. వెంటనే వారు ఓ సూట్ కేసు చూపించి అందులో నగదు ఉన్నాయని.. దాని తాళాలు మరిచిపోయామన్నారు. దగ్గరలో ఉన్న బ్యాంకుకు వెళ్తే నీ నగదు నీకు ఇస్తామని తెలిపారు. అప్పటి నీ డబ్బులు నీ దగ్గరే ఉండనివ్వు అని సురేష్ ఇచ్చిన పాలిథిన్ కవర్కు బదులుగా ఆ కవర్ను పోలీన మరో కవర్ అతనికి ఇచ్చారు.
బ్యాంక్కు బయలుదేరేందుకు రెస్టారెంట్ నుంచి బయటకు వచ్చారు. అందరం కలిసి ఆటోలో వెళ్దామని చెప్పి అందరు దగ్గరలోని బ్యాంక్కు ఆటోలో బయల్దేరారు. కొంత దూరం వెళ్లిన తర్వాత ఆటో వద్దని కారులో వెళ్దామన్నారు. ఆటోలోంచి దిగే సమయంలో సురేష్ను ముందుగా దించి వారు ఆదే ఆటోలో పరారయ్యారు. వారు ఆటో దింపగానే సురేష్కు అనుమానం కలిగి వారు తిరిగి ఇచ్చిన కవర్ను తెరిచి చూడగా.. అతనికి అసలు విషయం అర్థమైంది. తాను మోసపోయానని లభోదిభోమంటూ స్థానిక పోలీస్ స్టేషన్కు పరుగులు తీశాడు. జరిగిన కథ మొత్తం పోలీసులకు వివరించి.. తనకు తిరిగి ఇచ్చిన కవర్లో తన 12 లక్షల నగదుకు బదులు నోట్ల రూపంలో ఉన్న నల్లటి కాగితాలు ఉన్నాయని పోలీసులకు ఫిర్యాదు చేశాడు. కేసు నమోదు చేసుకున్న పోలీసులు దర్యాప్తు చేపట్టారు.
ఇవీ చదవండి :
