Tekkali YSRCP MLA Candidate: రానున్న శాసనసభ ఎన్నికల్లో టెక్కలి ఎమ్మెల్యే అభ్యర్థిగా తన భార్య అయిన టెక్కలి జెడ్పీటీసీ సభ్యురాలు దువ్వాడ వాణి పోటీ చేస్తారని వైసీపీ ఎమ్మెల్సీ దువ్వాడ శ్రీనివాస్ ప్రకటించారు. శ్రీకాకుళం జిల్లా టెక్కలిలో విలేకరుల సమావేశంలో ఆయన మాట్లాడారు. ఏప్రిల్ 19న మూలపేట పోర్టు శంకుస్థాపన కార్యక్రమానికి వచ్చిన రాష్ట్ర ముఖ్యమంత్రి జగన్మోహన్ రెడ్డి తనను ఎమ్మెల్యే అభ్యర్థిగా ప్రకటించినప్పటికీ.. మహిళా సాధికారతకు అత్యంత ప్రాధాన్యత ఇస్తున్న ముఖ్యమంత్రి ఆలోచనలకు అనుగుణంగా టెక్కలి నుంచి మహిళా అభ్యర్థి బరిలో దిగితే బాగుంటుందని పలు దఫాలుగా తాను ముఖ్యమంత్రికి ప్రతిపాదించినట్లు చెప్పారు.
Duvvada Srinivas Wife Vani: చివరికి అంగీకరించి తన భార్యకు ఎమ్మెల్యే టికెట్ ఇస్తున్నట్లు అంగీకరిచారని అన్నారు. నియోజకవర్గ ప్రజలు అత్యధికమెజార్టీతో గెలిపించి, వైసీపీ జెండా ఎగురవేసే విధంగా ఆదరించాలని కోరారు. కొద్ది వారాల క్రితమే దువ్వాడ శ్రీనివాస్ దంపతులు విలేకరుల సమావేశం పెట్టి తమ భార్యాభర్తల మధ్య విభేదాలు లేవని.. కొంతమంది తప్పుడు ప్రచారాలు చేస్తున్నారని ఆరోపించారు. ఇది జరిగిన కొద్ది రోజులకే ఎమ్మెల్యే అభ్యర్థి మార్పు నియోజకవర్గంలో చర్చనీయాంశమైంది.
సీఎంను కలిసిన దువ్వాడ: ఎమ్మెల్సీ దువ్వాడ శ్రీనివాస్, జడ్పీటీసీ సభ్యురాలు వాణి.. ముఖ్యమంత్రి జగన్‌మోహన్‌రెడ్డిని గురువారం కలిశారు. ఆ సమయంలోనే ఈ నిర్ణయం గురించి చర్చ జరిగినట్లు సమాచారం. ఈ విషయం గురించి సామాజిక మాధ్యమాల్లో జోరుగా ప్రచారం కూడా సాగింది. దీంతో నేడు దువ్వాడ శ్రీనివాస్.. స్వయంగా ఈ నిర్ణయాన్ని ప్రకటించారు.
కొన్ని నెలల క్రితం శ్రీనివాస్ పేరు: టెక్కలి ఎమ్మెల్యే అభ్యర్థిగా దువ్వాడ శ్రీనివాస్ పేరును కొన్ని నెలల కిందట తాడేపల్లిలో జరిగిన నియోజకవర్గ ముఖ్య నేతల సమావేశంలో ముఖ్యమంత్రి జగన్ స్వయానా ప్రకటించారు. అదేవిధంగా.. గత నెల 19వ తేదీన నౌపడలో జరిగిన బహిరంగ సభలోనూ ముఖ్యమంత్రి ప్రకటించారు. దువ్వాడ శ్రీనివాస్ టెక్కలి అభ్యర్థి అని.. ఎవరికైనా ఎలాంటి అనుమానాలు ఉన్నా పార్టీకి నష్టం జరుగుతుందని.. అందుకే ముందుగానే ప్రకటించినట్లు తెలిపారు.
అది జరిగిన కొన్ని నెలల్లోనే.. ఆయన భార్య పేరును తెర మీదకి తీసుకురావడంతో సర్వత్రా చర్యనీయాంశమైంది. స్వయానా దువ్వాడ శ్రీనివాస్ స్పందించడంతో.. ఆయన భార్య వాణి పేరు ఫిక్స్ అయింది.
"నేను.. టెక్కలి నియోజకవర్గంలో ఎమ్మెల్యే అభ్యర్థిగా పోటీచేస్తానని గత నెల 19వ తేదీన జగనన్న ప్రకటించడం జరిగింది. మహిళా సాధికారతకు అత్యంత ప్రాధాన్యత ఇస్తున్న జగనన్న ఆలోచనలలో భాగంగా.. టెక్కలి నియోజకవర్గం నుంచి మహిళ పోటీ చేస్తే బాగుంటుందని జగనన్నకి చెప్పాను. కానీ జగనన్న నన్నే పోటీ చేయమని అన్నారు. పలు దఫాలుగా తన ప్రతిపాదనను ఆయన ముందు ఉంచగా.. జగనన్న పరిశీలించి అంగీకరించడం జరిగింది. టెక్కలి నుంచి దువ్వాడ వాణి పోటీ చేస్తారని తెలియజేస్తున్నాను". - దువ్వాడ శ్రీనివాస్, వైసీపీ ఎమ్మెల్సీ
ఇవీ చదవండి:
