KALYANAM: ప్రకాశం జిల్లా మద్దిపాడు మండలం మల్లవరంలో కొండపై వెలసిన శ్రీనివాసుని కల్యాణం బుధవారం వైభవోపేతంగా జరిగింది. స్వర్ణాలంకరణ భూషితుడై ఉభయ దేవతలతో కొలువుదీరిన స్వామివారి కల్యాణాన్ని తిలకించేందుకు భక్తజనం పోటెత్తారు. వేదపండితుల మంత్రోచ్ఛారణల నడుమ కళ్యాణ మూర్తులను మండపంలో కొలువుదీర్చి కళ్యాణ కట్టని ప్రారంభించారు.
దివి వెంకట శేషాచార్యుల ఆధ్వర్యంలో యజ్ఞ హోమాలు నిర్వహించగా.. కళ్యాణ ఘట్టాన్ని వెంకటాచార్యులు, రాజశేఖర్ ఆచార్యుల సమక్షంలో వేదమంత్రాలు, మంగళవాయిద్యాల నడుమ వైభవంగా నిర్వహించారు. స్వర్ణ శోభితాలంకరణలో స్వామి వారిని తిలకించిన భక్తులు తన్మయత్వంలో మునిగిపోయారు. స్వామివారి కల్యాణాన్ని చూసేందుకు సుమారు లక్ష మందికి పైగా తరలివచ్చారు. కల్యాణం అనంతరం రథోత్సవ కార్యక్రమాన్ని అంగరంగ వైభవంగా నిర్వహించారు. ఈ కార్యక్రమం మొత్తం ఈవో లీలాకృష్ణ పర్యవేక్షణలో జరిగింది. ఉత్సవానికి వచ్చిన భక్తులకు శీతలపానీయాలు, మజ్జిగ, పళ్లరసాలు ఆలయ ప్రాంగణంలో ఏర్పాటు చేశారు.
కళ్యాణ మహోత్సవానికి తరలివచ్చిన భక్తులకు ఎక్కడా లోటులేకుండా గ్రామంలోని తెలుగు యువత ఆధ్వర్యంలో ప్రత్యేక ఏర్పాట్లు చేశారు. వేసవిలో భక్తులకు ఆరోగ్యపరమైన ఇబ్బందులు కలగకుండా ఆరోగ్యకేంద్రం వారి సహకారంతో మెడికల్ క్యాంప్ ఏర్పాటు చేశారు. కల్యాణోత్సవంలో భక్తులకు ఎటువంటి ఇబ్బందులు కలగకుండా పోలీస్ శాఖ ప్రత్యేక బందోబస్తు ఏర్పాట్లు చేసింది. ఈ కళ్యాణ ఉత్సవాన్ని తిలకించేందుకు గుంటూరు, కృష్ణ, నెల్లూరు జిల్లాల నుంచే కాకుండా తెలంగాణ రాష్ట్రం నుంచి కూడా భక్తులు అధిక సంఖ్యలో పాల్గొన్నారు. మే 11న ప్రారంభమైన ఈ ఉత్సవాలు 21వ తేదీ వరకు కొనసాగనున్నాయి.
ఇవీ చదవండి:
