BC unity sabha: 'వైసీపీ దౌర్జన్యాలను అడ్డుకుందాం.. బీసీల మనుగడను కాపాడుకుందాం'

BC unity round table meeting updates: గడచిన నాలుగేళ్లలో రాష్ట్రవ్యాప్తంగా ఉన్న బీసీలు అనేక రకాలుగా అణచివేతలకు గురవుతూనే ఉన్నారని.. బీసీ కుల సంఘాల నాయకులు తీవ్రంగా ఆగ్రహం వ్యక్తం చేశారు. నెల్లూరు జిల్లాలో టీడీపీ ఆధ్వర్యంలో జరిగిన బీసీ ఐక్య కార్యాచరణ రౌండ్ టేబుల్ సమావేశానికి అఖిలపక్ష నాయకులు, బీసీ కుల సంఘాల నాయకులు హాజరై.. బీసీలు ఎదుర్కొంటున్న సమస్యలపై సుదీర్ఘంగా చర్చలు జరిపారు. అనంతరం 'వైసీపీ దౌర్జన్యాలను అడ్డుకుందాం-బీసీల మనుగడను కాపాడుకుందాం' అనే నినాదంతో వైసీపీ ప్రభుత్వంపై పోరాటానికి పిలుపునిచ్చారు.

BC unity round table meeting updates: నెల్లూరు జిల్లాలోని కస్తూరి దేవి గార్డెన్స్‌లో బీసీ ఐక్య కార్యాచరణ కమిటీ రౌండ్ టేబుల్ జరిగింది. ఈ సమావేశానికి ఎన్నడూ లేని విధంగా రాష్ట్రంలోని అన్నీ పార్టీల నాయకులు పాల్గొని సుదీర్ఘంగా చర్చలు జరిపారు. ముఖ్యంగా గత నాలుగేళ్లుగా బీసీలు ఎదుర్కొంటున్న సమస్యలపై, వాటి పరిష్కారాలపై, భవిష్యత్తు కార్యచరణపై బీసీ కుల సంఘాలు నాయకులు ప్రసంగించారు. ఈ రౌండ్ టేబుల్ సమావేశానికి తెలగుదేశం పార్టీ రాష్ట్ర అధ్యక్షులు అచ్చెన్నాయుడు, జాతీయ కార్యదర్శి బీద రవిచంద్ర, మాజీ మంత్రులు యనమల రామకృష్ణుడు, కొల్లు రవీంద్ర, అఖిలపక్ష బీసీ నాయకులు హాజరయ్యారు.

టీడీపీ గెలిస్తేనే బీసీలకు భవిష్యత్.. ఈ సందర్భంగా బీసీ టీడీపీ రాష్ట్ర అధ్యక్షుడు, మాజీమంత్రి కొల్లు రవీంద్ర మాట్లాడుతూ.. వైఎస్సార్ కాంగ్రెస్ పార్టీ పాలనలో రాష్ట్రంలో సగానికిపైగా ఉన్న బీసీలకు తీరని అన్యాయం జరుగుతోందన్నారు. ఈ అన్యాయాలను ఎదురించాలంటే బీసీలంతా కలిసికట్టుగా పోరాడాలని పిలుపునిచ్చారు. గత నాలుగేళ్లలో బీసీలపై జరిగిన దాడులను దృష్టిలో ఉంచుకుని.. తెలుగుదేశం పార్టీ బీసీ విభాగం ఆధ్వర్యంలో నేడు ఈ బీసీ ఐక్య కార్యాచరణ కమిటీ రౌండ్ టేబుల్ సమావేశాన్ని నిర్వహించామని తెలిపారు.

గత ప్రభుత్వ హయాంలో బీసీలకిచ్చిన సబ్సిడీ రుణాలు, ఇతర పరిహారాలను నేటి ప్రభుత్వం పూర్తిగా బంద్ చేసిందని గుర్తు చేశారు. వైసీపీ అధికారంలోకి వచ్చిన రోజు నుంచి నేటిదాకా దాదాపు 30 మంది బీసీలు హత్యకు గురయ్యారని ఆగ్రహం వ్యక్తం చేశారు. దివంగత ఎన్టీఆర్ తెలుగుదేశం పార్టీ పెట్టినప్పుడే బీసీలకు ప్రత్యేక రిజర్వేషన్ పెట్టారని, ఆ తర్వాత బీసీలు ఆ రిజర్వేషన్లు కోల్పోయారని ఆయన వాఖ్యానించారు.

బీసీలంటే వీక్ కాదు..స్ట్రాంగ్.. మాజీమంత్రి యనమల రామకృష్ణుడు మాట్లాడుతూ.. ''స్వతంత్రం వచ్చిన తరువాత బీసీలంటే వీకర్స్ అనే ముద్ర వేశారు. కానీ, ప్రజాస్వామ్య రాజకీయంలో బీసీలంటే వీక్ కాదు.. బ్యాక్ బోన్. ఆ వీక్ అనే పదం లేకుండా పోవాలంటే బీసీలంతా ఐక్యంగా ఉండాలి. బీసీలు పరిపాలనలో భాగస్వాములు కావాలి. అప్పుడే బీసీల బలమెంటో దేశానికి తెలుస్తుంది. కాబట్టి ఇప్పటికైనా రాష్ట్రంలో ఉన్న అన్నీ బీసీల ప్రజలు ఏకమై, వచ్చే ఎన్నికల్లో తెలుగుదేశం పార్టీ గెలిపించి.. బందైపోయిన పథకాలను, రిజర్వేషన్లను మళ్లీ తిరిగి తెచ్చుకోవాలి'' అని ఆయన అన్నారు.

పోరాటానికి సిద్దకండి.. బీసీల ఆత్మ గౌరవాన్ని వైఎస్సార్సీపీ తీవ్రంగా దెబ్బతీస్తోందని.. టీడీపీ, బీజేపీ, సీపీఎం, సీపీఐ, కాంగ్రెస్, జనసేన, ఆమ్ ఆద్మీ పార్టీ ప్రతినిధులు ఆగ్రహం వ్యక్తం చేశారు. 'వైసీపీ దౌర్జన్యాలను అడ్డుకుందాం-బీసీల మనుగడను కాపాడుకుందాం' అనే నినాదంతో వైసీపీ ప్రభుత్వంపై పోరాటానికి సిద్దం కావాలన్నారు. ఇప్పటికైనా బీసీలందరూ ఐఖ్యంగా కలిసి పోరాటం చేయాలని.. రాబోయే రోజుల్లో బీసీలపై, మహిళలపై జరగబోయే అన్యాయాలను, దౌర్జన్యాలను సమర్థవంతంగా అడ్డుకోవాలని పిలుపునిచ్చారు.

ఇవీ చదవండి