విధి నిర్వహణలో వాహనాలు మళ్లించేందుకు వెళ్లి.. నీటి ప్రవాహం ఉద్రిక్తంగా మారడంతో సీఐ, ఎస్ఐలు రాత్రంతా జాతీయ రహదారిపై నిరీక్షించారు. నెల్లూరు జిల్లా సంగం మండలం పెరమన గ్రామం వద్ద జాతీయ రహదారిపై పెన్నానది ఉద్ధృతంగా ప్రవహిస్తోంది. సమాచారం తెలుసుకొని బుచ్చిరెడ్డిపాలెం సర్కిల్ ఇన్స్పెక్టర్ సురేష్ బాబు, సంగం మండలం ఎస్సై శ్రీకాంత్లు సిబ్బందితో అక్కడికి చేరుకున్నారు. బీరాపేరు, బొగ్గేరు వాగుల నీటిప్రవాహం జత కలిసి పెన్నానదికి భారీగా వరద నీరు చేరుకుంది. సంగం మండల కేంద్రం నుంచి ఆత్మకూరు మండలం వాసిలి వరకు సుమారు 6 కిలోమీటర్ల మేర జాతీయ రహదారిపై భారీగా వరద నీరు చేరింది. రహదారి, పొలాలను ఏకం చేస్తూ నీరు ప్రవహించటం ఆ ప్రాంతమంతా చెరువును తలపించింది.
ఈ ప్రవాహంలో రహదారిపై వాహనాలు రాకపోకలు జరిపితే ప్రమాదం తప్పదని ఊహించిన ఎస్ఐ, సీఐలు చుట్టుపక్కల గ్రామాల వారిని అప్రమత్తం చేశారు. జాతీయ రహదారిపై వాహనాలను నిలుపుదల చేసి.. సమీపంలోని కోలగట్ల, వీర్ల గుడిపాడు గ్రామస్థులను కూడా అప్రమత్తం చేశారు. అనంతరం వీరు తిరిగి మండల కేంద్రానికి వెళ్లేందుకు ప్రయాణమైన క్రమంలో పెరమన సమీపంలోకి రాగానే ఒక్కసారిగా వరద ఉద్ధృతి ఎక్కువైంది. పోలీసులు ప్రయాణిస్తున్న వాహనం వెళ్లేందుకు వీలులేకుండా ప్రవాహంలో చిక్కుకున్నారు. దీంతో రాత్రంతా అక్కడే జాతీయ రహదారిపై నిరీక్షించారు.
తెల్లవారేసరికి కొద్దిగా నీటి ప్రవాహం తగ్గిన అనంతరం వాహనాలను విడిచిపెట్టారు. ఇండియా ఆఫ్ బలగాలను నీటి ప్రవాహం వద్ద ఉంచి సీఐ సురేష్ బాబు, ఎస్సై శ్రీకాంత్లు బయలుదేరి వెళ్లారు. సీఐ సురేష్ బాబు విధి నిర్వహణలో భాగంగా వరద ప్రాంతానికి వచ్చి.. ప్రజలను అప్రమత్తం చేసేందుకు రాత్రంతా రహదారిపై ఆగి ఉండటం పలువురు అభినందిస్తున్నారు.
ఇవీ చూడండి...
