Vijayawada Minor Girl Case Judgment : తనకు కుమార్తె వయసు ఉన్న బాలికను ప్రతిరోజు లైంగికంగా వేధించి, ఆత్మహత్యకు కారకుడైన వ్యక్తి న్యాయస్థానం శిక్ష విధించింది. 2 నెలల పాటు ప్రతిరోజు అసభ్యకర మాటలతో ఇబ్బంది పెట్టడంతో భరించలేక అపార్ట్‌మెంట్‌పైకి వెళ్లి దూకి ప్రాణాలు తీసుకుంది. ఈ కేసులో బాలికను లైంగిక వేధించి, ఆత్మహత్యకు ప్రేరేపించినందుకు నిందితుడు వినోద్ కుమార్ జైన్ (49)కు జీవిత ఖైదు, మూడు లక్షల రూపాయల జరిమానా విధిస్తూ విజయవాడ పోక్సో కోర్టు న్యాయమూర్తి ఎస్.రజిని బుధవారం తీర్పు చెప్పారు.
వివిధ సెక్షన్ల కింద కేసు నమోదు : గత సంవత్సరం జనవరి 29న జరిగిన ఈ ఘటనకు సంబంధించి మైనర్ అమ్మాయి తాత ఇచ్చిన ఫిర్యాదు మేరకు అదే రోజు భవానీపురం పోలీసులు ఐపీసీ సెక్షన్లు 306, 354ఏ, 354, , 509, 354డి,506, పోక్సో చట్టంలోని 8, 10 సెక్షన్ల కింద కేసు నమోదు చేశారు. అనంతరం దర్యాప్తు చేపట్టారు. కేసును భవానీపురం పీఎస్‌ ఎస్ఐ ప్రసాద్‌ దర్యాప్తు చేశారు. ఈ కేసులో 20 మంది సాక్షుల విచారించి, వారి వాగ్మూలాలను ప్రత్యేక పబ్లిక్‌ ప్రాసిక్యూటర్లు గుజ్జల నాగిరెడ్డి, జీవీ నారాయణరెడ్డి న్యాయస్థానంలో నమోదు చేయించారు. ఈ కేసులో నిందితుడిపై నేరారోపణ రుజువు అయింది. నిందితుడు గత సంవత్సరం ఫిబ్రవరి 1వ తేదీ నుంచి ఇప్పటి వరకు రిమాండ్‌లోనే ఉన్నాడు.
క్రూరమైన నేరంగా పరిగణించాలని తీర్పు : ఐపీసీ సెక్షన్‌ 305 కింద జీవిత ఖైదు, లక్ష రూపాయల జరిమానా, పోక్సో సెక్షన్‌ 9 (ఎల్‌), 10 కింద ఏడేళ్ల కఠిన కారాగార శిక్ష, 50వేలు రూపాయల జరిమానా, పోక్సో చట్టం సెక్షన్‌ 12 కింద మూడు సంవత్సరాల శిక్ష, 50వేల రూపాయల జరిమానా, ఐపీసీ సెక్షన్‌ 354 కింద ఐదు సంవత్సరాల కఠిన కారాగార శిక్ష, 50వేల రూపాయల జరిమానా, ఐపీసీ సెక్షన్‌ 509 కింద మూడు సంవత్సరాల కఠిన కారాగార శిక్ష, 50వేల రూపాయల జరిమానా విధిస్తూ న్యాయమూర్తి తీర్పులో పేర్కొన్నారు. ఈ శిక్షలన్నీ ఒకే సమయంలో అమలవుతాయని, 3 లక్షల రూపాయలు జరిమానాలో, 2.4లక్షల రూపాయలు బాధితురాలి కుటుంబానికి చెల్లించాలని కోర్టు ఉత్తర్వుల్లో పేర్కొంది. మైనర్ బాలికను లైంగికంగా వేధించి ఆమె మరణించడానికి కారణమైన, ఆమె తల్లిదండ్రులు మానసిక క్షోభకు గురి అవ్వడానికి కారణమైన ఈ కేసును క్రూరమైన నేరంగా పరిగణించాలని న్యాయమూర్తి తీర్పులో తెలిపారు.
వెకిలిగా మాట్లాడిన వినోద్ కుమార్ జైన్.. భయపడిన బాలిక : విద్యాధరపురం కుమ్మరిపాలెం సెంటర్‌లోని లోటస్‌ అపార్ట్‌మెంట్‌లో ఫ్లాట్‌ నెంబర్‌ 43లో నివసించే వినోద్ జైన్ అదే అపార్ట్‌మెంట్‌లో నివసించే 13 సంవత్సరాల బాలిక పట్ల అసభ్యంగా ప్రవర్తించే వాడు. 2 నెలల పాటు ప్రతిరోజు నరకం చూపించాడు. ప్రతిరోజూ నివాసం నుంచి బయటకు వెళ్లేటప్పుడు, తిరిగి వచ్చే సమయంలో బాలిక శరీరాన్ని తాకుతూ అసభ్యకరంగా మాట్లాడుతుండేవాడు. జీన్స్‌లో అందంగా ఉన్నావు, నీ కాళ్లు పొడవుగా ఉన్నాయంటూ వెకిలిగా మాట్లాడుతూ ఇబ్బంది పెడుతుండేవాడు. మెట్లు, లిఫ్ట్‌ వద్ద వినోద్ కూమార్ జైన్ వెంబడిస్తూ అసభ్యంగా ప్రవర్తించేవాడు. ఆ విషయాన్ని తల్లిదండ్రులకు చెబితే ఏమీ జరుగుతుందో అని బాలిక ఆందోళన చెందింది. మరో వైపు అతని వేధింపులు ఆగకపోవడంతో గత సంవత్సరం జనవరి 29న సాయంత్రం 5 గంటల సమయంలో అపార్ట్‌మెంట్‌ టెర్రస్‌ పై నుంచి బాలిక దూకి ఆత్మహత్య చేసుకుంది.
కీలక సాక్ష్యంగా మారిన లేఖ : బాలిక ఆత్మహత్య చేసుకునే ముందు 3 పేజీల లేఖ రాసింది. వినోద్ జైన్ వేధింపులతోనే తనువు చాలిస్తున్నట్లు లేఖలో పేర్కొంది. 'అమ్మా.. నేను ఈ విషయాన్ని మొదట్లోనే చెప్పలేదు. నేను చాలా భయపడ్డాను. సిగ్గుగా భావించా. జీవితంలో ఇంకేదైనా సమస్య అయితే.. చనిపోయేదాన్ని కాదేమో. కానీ ఈ విషయంలో నేను ఏమీ చేయలేకపోయాను. దీనికి అంతటికీ కారణం వినోద్ జైన్. గత రెండు నెలలుగా లైంగికంగా వేధిస్తున్నాడు. తరచూ నా శరీరాన్ని తాకుతున్నాడు.' అని బాలిక నోట్‌లో ఇంగ్లీష్లో రాసి ఆత్మహత్య చేసుకుంది. మిమ్మల్ని వదిలి వెళ్లాలని లేకపోయినా, నాకు తప్పని పరిస్థితి వచ్చిందని.. ఇదే నా ఆఖరి రోజు అంటూ ఆవేదన వ్యక్తం చేస్తూ రాసింది. ఈ సంఘటన జరగడానికి 2 రోజుల ముందు తన సెల్‌ఫోన్‌లో 'నాకు చనిపోవాలని ఉంది' అని 19 సార్లు టైప్‌ చేసింది. ఆ బాలిక తన సొంత దస్తూరీతో రాసిన లేఖ ఈ కేసులో కీలక సాక్ష్యంగా మారింది. బాలిక రాతను ఫోరెన్సిక్‌ నిపుణులు ధ్రువీకరించారు. ఇది నిందితుడి శిక్ష వినోద్ జైన్ పడేందుకు ఉపయోగపడింది.
ఇవీ చదవండి
