TDP Agitation Continues Against Chandrababu Arrest : కృష్ణా జిల్లా పెనుమలూరు నియోజకవర్గంలో టీడీపీ నేత బోడె ప్రసాద్ ఆమరణ నిరాహార దీక్షను పోలీసులు భగ్నం చేశారు. మాజీ ముఖ్యమంత్రి చంద్రబాబు అరెస్టు నిరసిస్తూ గత మూడు రోజులుగా ఆమరణ నిరాహార దీక్ష చేస్తున్న పెనమలూరు నియోజకవర్గం తెలుగుదేశం పార్టీ ఇంచార్జ్ మాజీ ఎమ్మెల్యే బోడె ప్రసాద్ ఆమరణ నిరాహార దీక్షను అర్ధరాత్రి పోలీసులు భగ్నం చేశారు. అనంతరం బోడె ప్రసాద్ను అర్ధరాత్రి 12:30 గంటల సమయంలో అరెస్టు చేసి.. ప్రభుత్వ వైద్యశాలకు తరలించారు.
TDP Cadre Protest in AP : అనంతపురం జిల్లా తెలుగు యువత రాష్ట్ర అధికార ప్రతినిధి దండు శ్రీనివాసులు ఆధ్వర్యంలో చంద్రబాబు అరెస్టుకు నిరసనగా సింగనమలలో నిరసన చేపట్టారు. రిలే నిరాహార దీక్ష శిబిరంలో సుమారు 20 నుంచి 30 మంది వరకు అర్థ శిరో మండనం చేయించుకున్నారు. టీడీపీ నాయకులు, కార్యకర్తలు ఫ్లకార్డులు పట్టుకొని "సైకో పోవాలి సైకిల్ రావాలి" అంటూ నినాదాలు చేశారు. ఉరవకొండ పట్టణంలో టీడీపీ వడ్డేర్ల సాధికారక సమితి ఆధ్వర్యంలో భారీ ర్యాలీ నిర్వహించారు. దీక్ష శిబిరం నుంచి టవర్ క్లాక్ వరకు భారీ ర్యాలీ చేశారు. చంద్రబాబు నాయుడును వెంటనే విడుదల చేయాలని డిమాండ్ చేశారు.
గోవిందా నామాలతో నిరసన : చంద్రబాబు అరెస్ట్ను నిరసిస్తూ కర్నూలు జిల్లా ఆదోనిలో టీడీపీ శ్రేణులు వినూత్న నిరసన చేపట్టారు. మాజీ ఎమ్మెల్యే మీనాక్షి నాయుడు ఆధ్వర్యంలో దీక్ష శిబిరం వద్ద టీడీపీ అభిమానులు అర గుండు చేసుకుని నిరసన తెలిపారు. ప్రభుత్వానికి వ్యతిరేకంగా గోవిందా నామాలతో నిరసన చేశారు. చంద్రబాబుపై ప్రభుత్వం కక్షపూరితంగా వ్యవహరిస్తోందని టీడీపీ నాయకులు ఆరోపించారు.
చంద్రబాబుకు సంఘీభావంగా ప్రొఫెషనల్ భారీ ర్యాలీ : టీడీపీ అధినేత నారా చంద్రబాబుకు సంఘీభావాన్ని వ్యక్తం చేస్తూ చిత్తూరు జిల్లా కుప్పంలో ప్రొఫెషనల్ ఆధ్వర్యంలో భారీ ర్యాలీ నిర్వహించారు. బెంగళూరు, చెన్నై, విజయవాడ, హైదరాబాదు తదితర నగరాల్లో వృత్తిరీత్యా స్థిరపడిన కుప్పం ప్రాంతానికి చెందిన ఉద్యోగులు పెద్ద ఎత్తున సంఘీభావ ర్యాలీని చేపట్టారు, కుప్పంలోని చెరువు కట్ట వద్ద ప్రారంభమైన ర్యాలీ నేతాజీ రోడ్డు మీదుగా కొత్తపేట వరకు సాగింది, చంద్రబాబుకు మద్దతుగా, ఐటీ ఉద్యోగులు, వైద్యులు ఉపాధ్యాయులు ఇతర ఉద్యోగులు నినాదాలు చేశారు. చంద్రబాబుకు ప్రతి ఒక్కరూ అండగా నిలవాలని పిలుపునిచ్చారు.
చంద్రబాబు అరెస్టు నిరసిస్తూ వైఎస్సార్ జిల్లా మైదుకూరులో చేపట్టిన రిలే దీక్షలు 19వ రోజుకు చేరుకున్నాయి. పార్టీ నియోజకవర్గ బాధ్యుడు పుట్టా సుధాకర్ యాదవ్ నాయకత్వంలో ఐటీడీపీ పార్టీ అనుబంధ సంఘాల ప్రతినిధులు రిలే దీక్షలో పాల్గొన్నారు. చంద్రబాబు విడుదల చేసే వరకు తమ పోరాటం ఆగదని హెచ్చరించారు. చంద్రబాబుపై పెట్టిన అక్రమ కేసును వెంటనే రద్దు చేయాలని డిమాండ్ చేశారు.
18వ రోజు నిరసన దీక్ష : చంద్రబాబు నాయుడు అరెస్ట్ను నిరసిస్తూ గుంటూరు జిల్లా మంగళగరిలో టీడీపీ నాయకులు 18వ రోజు నిరసన దీక్షలు కొనసాగించారు. తెలుగు యువత ఆధ్వర్యంలో వినూత్న నిరసన చేపట్టారు. వైసీపీ ప్రభుత్వం ప్రజాస్వామ్యానికి సంకెళ్లు వేసిందని తెలియజేసేలా తెలుగు యువత నాయకులు తమ చేతులకు సంకెళ్లు వేసుకొని నిరసన తెలిపారు.
చంద్రబాబు అరెస్టు కక్ష సాధింపు చర్యని అల్లూరి సీతారామరాజు జిల్లా రంపచోడవరం మాజీ ఎమ్మెల్యేలు వంతల రాజేశ్వరి, సీతంశెట్టి వెంకటేశ్వరరావు , చిన్నం బాబు రమేష్ అన్నారు. చంద్రబాబు అరెస్టు నిరసిస్తూ రంపచోడవరంలో టీడీపీ శ్రేణులు చేపట్టిన రిలే నిరాహార దీక్షలు ఆదివారం 19వ రోజుకు చేరాయి. ముందుగా ఎన్టీఆర్ విగ్రహానికి పూలమాలలు వేసి నివాళులు అర్పించారు. ఈ సందర్భంగా మాజీ ఎమ్మెల్యేలు మాట్లాడుతూ రోజురోజుకు టీడీపీకు వస్తున్న ఆదరణను అభిమానాన్ని చూడలేక వైసీపీ కుట్రలు చేస్తుందని విమర్శించారు. వచ్చే ఎన్నికల్లో ప్రజలు తగిన గుణపాఠం చెబుతారని అన్నారు.
చంద్రబాబు నాయుడు అరెస్టు నిరసనగా తెలుగుదేశం పార్టీ ఆధ్వర్యంలో పశ్చిమ గోదావరి జిల్లా తణుకులో చేస్తున్న రిలే నిరాహారదీక్షలు 19వ రోజుకు చేరుకున్నాయి. పార్టీ నాయకులు కార్యకర్తలతో పాటు తూర్పు కాపు సంఘ నాయకులు కార్యకర్తలు నిరాహార దీక్షలో పాల్గొన్నారు.
మాజీ ఎమ్మెల్యే ఆరిమిల్లి రాధాకృష్ణ మాట్లాడుతూ చంద్రబాబు అరెస్టుకు నిరసనగా నారా బ్రాహ్మణి ఇచ్చిన పిలుపునకు మోత మోగిద్దాం కార్యక్రమాన్ని రాష్ట్ర వ్యాప్తంగా ప్రజలందరూ స్వచ్ఛందంగా పాల్గొన్నారని చెప్పారు. ఇప్పటికైనా తమ అధినేత చంద్రబాబు నాయుడును వెంటనే విడుదల చేయాలని రాధాకృష్ణ డిమాండ్ చేశారు.
ఎన్టీఆర్ జిల్లా నందిగామ తెలుగుదేశం పార్టీ కార్యాలయంలో తెలుగుదేశం పార్టీ అధినేత చంద్రబాబు నాయుడు అక్రమ అరెస్టుకు నిరసనగా 19వ రోజు రిలే నిరాహార దీక్షలు చేపట్టారు. తేదేపా, జనసేన కార్యకర్తలు చేపట్టిన రిలే నిరాహార దీక్షను మాజీ ఎమ్మెల్యే తంగిరాల సౌమ్య ప్రారంభించారు. ఈ కార్యక్రమంలో పెద్ద సంఖ్యలో కార్యకర్తలు పాల్గొన్నారు.
కోనసీమ జిల్లా రావులపాలెంలో మాజీ ఎమ్మెల్యే బండారు సత్యానందరావు ఆధ్వర్యంలో వికలాంగులు వినూత్నంగా నిరసన తెలిపారు. వికలాంగులు చంద్రబాబు మాస్కులు ధరించి చంద్రబాబును వెంటనే విడుదల చేయాలని నినాదాలు చేశారు. అధికారాన్ని అడ్డుపెట్టుకున్న జగన్ చంద్రబాబునాయుడిపై అక్రమ కేసులు పెట్టడం కాదని అధారాలు చూపించాలని వికలాంగులు డిమాండ్ చేశారు.
చంద్రబాబు నాయుడు అరెస్టును ఖండిస్తూ పి గన్నవరంలో తెలుగుదేశం నాయకులు నిరసన దీక్ష చేపట్టారు. 22 రోజులుగా వీరు రిలే నిరాహార దీక్షలు చేస్తున్నారు. చంద్రబాబునాయుడు వెంటనే విడుదల చేయాలని నినాదాలు చేశారు.
