వర్షాలకు రైతులు నష్టపోయినా.. ప్రభుత్వానికి చీమ కుట్టినట్లైనా లేదు: రామకృష్ణ

CPI State Secretary K Ramakrishna: అకాల వర్షాలకు వేలాది ఎకరాల్లో పంటలు దెబ్బతిన్నా.. ప్రభుత్వానికి చీమ కుట్టినట్టైనా లేదని సీపీఐ రాష్ట్ర కార్యదర్శి రామకృష్ణ విమర్శించారు. దెబ్బతిన్న పంటలను పరిశీలించి.. వెంటనే నష్ట పరిహారం చెల్లించాలని డిమాండ్ చేశారు. పోలవరం విషయంలో.. రాష్ట్రానికి కేంద్ర ప్రభుత్వం అన్యాయం చేస్తుంటే ముఖ్యమంత్రి జగన్‌ ప్రశ్నించకపోవడంపై మండిపడ్డారు.

CPI State Secretary K Ramakrishna: ఇటీవల కురిసిన అకాల వర్షాలు రైతులను నట్టేట ముంచాయి. ఆరుగాలం కష్టపడి పండించిన తమ పంట నీటి పాలు కావడంతో.. అన్నదాతలు దిక్కుతోచని స్థితిలో పడ్డారు. అప్పులు చేసి పంట వేయగా.. వర్షాల వల్ల నష్టపోయి అప్పుల ఊబిలో చిక్కుకున్నారు.. ఆ అప్పులు తీర్చే మార్గం లేక ఆత్మహత్యలే శరణ్యమని రైతులంటున్నారు.

నష్టపోయిన రైతులను ఆదుకోవాల్సిన ప్రభుత్వానికి కనీసం చీమ కుట్టినట్టైనా లేదని.. ఎలాంటి సహాయక చర్యలు చేపట్టకుండా ఉందని సీపీఐ రాష్ట్ర కార్యదర్శి కె. రామకృష్ణ ఆగ్రహం వ్యక్తం చేశారు. ముఖ్యమంత్రి దెబ్బ తిన్న పంటలను పరిశీలించి.. నష్టపోయిన రైతులకు నష్టపరిహారం ఇచ్చి తగిన చర్యలు చేపట్టాలని అన్నారు. కేంద్రంలో బీజేపీ ప్రభుత్వం రాష్ట్రానికి పూర్తిగా అన్యాయం చేస్తుంటే.. ముఖ్యమంత్రి జగన్మోహన్ రెడ్డి ఎందుకు ప్రశ్నించడంలేదని ఆరోపించారు.