somu veerraju on atmakur incident: ఆత్మకూరు ఘటన ఎస్‌డీపీఐ నిషేధిత సంస్థ పనే అని భాజపా రాష్ట్ర అధ్యక్షుడు సోము వీర్రాజు ఆరోపించారు. ఇవాళ గవర్నర్తో సమావేశం అనంతరం మీడియాతో మాట్లాడారు. ఆత్మకూరు ఘటనలో తమ పార్టీ నేత శ్రీకాంత్ రెడ్డిని చంపాలనే ప్రయత్నం జరిగిందన్నారు. భాజపా నేత వాహనం, పోలీసులపై రాళ్లు రువ్వడం ఎస్‌డీపీఐ పనే అని చెప్పారు. హత్యాయత్నానికి సంబంధించి తమ వద్ద ఆధారాలున్నాయని.. డీఎస్పీ రమ్మంటేనే శ్రీకాంత్ రెడ్డి వెళ్లారని స్పష్టం చేశారు.
పోలీసులే శ్రీకాంత్ రెడ్డిని రక్షించారన్న సోము వీర్రాజు .. అదే పోలీసులు శ్రీకాంత్‌రెడ్డిపై 307 సెక్షన్‌ కింద కేసు పెట్టారని ఆక్షేపించారు. ఈ విషయంలో చొరవ తీసుకోవాలని గవర్నర్‌ను కోరామని వెల్లడించారు. శ్రీకాంత్ రెడ్డిపై పెట్టిన 307 కేసు తొలగించాలని డిమాండ్ చేశారు. ఘటనకు సంబంధించి ప్రభుత్వం నిజాలు వెల్లడించాలన్నారు.
"ఆత్మకూరు ఘటనలో భాజపా నేత వాహనం, పోలీసులపై రాళ్లు రువ్వడం ఎస్‌డీపీఐ పనే. శ్రీకాంత్‌రెడ్డిని చంపాలనే ప్రయత్నం జరిగింది. హత్యాయత్నానికి సంబంధించి ఆధారాలున్నాయి. శ్రీకాంత్‌రెడ్డిపై 307 సెక్షన్‌ కింద కేసు పెట్టారు. ఈ విషయంలో చొరవ తీసుకోవాలని గవర్నర్‌ను కోరాం. శ్రీకాంత్ రెడ్డిపై పెట్టిన 307 కేసు తొలగించాలి" - సోము వీర్రాజు, భాజపా రాష్ట్ర అధ్యక్షుడు
ఆత్మకూరులో ఏం జరిగిందంటే..?
Tension at Atmakur City: కర్నూలు జిల్లా ఆత్మకూరు పట్టణంలో జనవరి 8వ తేదీన ఉద్రిక్త వాతావరణం నెలకొంది. ఓ నిర్మాణం విషయంలో సాయంత్రం రెండు వర్గాల మధ్య ఘర్షణ చోటు చేసుకోవటంతో.. రాళ్లు రువ్వుకున్నారు. అదే సమయంలో అక్కడికి వచ్చిన భాజపా నేత బుడ్డా శ్రీకాంత్ రెడ్డిని ఓ వర్గంవారు అడ్డుకున్నారు. ఈ క్రమంలో శ్రీకాంత్ రెడ్డి కారు ఒక్కసారిగా మనుషులపైకి వెళ్లటంతో ఇద్దరికి తీవ్రగాయాలయ్యాయి. దీంతో ఆగ్రహానికి గురైన మరో వర్గం... శ్రీకాంత్ రెడ్డి కారును ధ్వంసం చేశారు. పరిస్థితిని అదుపుచేసేందుకు పోలీసులు.. గాల్లోకి రెండు రౌండ్లు కాల్పులు జరిపారు. ఈ ఘటనలో పలువురికి గాయాలయ్యాయి.
ఇదీ చదవండి
'మీరు రూపాయి పెట్టి కోట్లు కొల్లగొడుతున్నారు.. సినీ పరిశ్రమపై ఏపీ నేతల వ్యాఖ్యలకు తమ్మారెడ్డి కౌంటర్
