ఇదేం పద్ధతి.. సొంత పనులకు ఇంటింటికి రేషన్ వాహనం...!

ఇంటింటికి రేషన్ చేరవేసేందుకు ప్రభుత్వం అందించిన వాహనాలను కొందరు తమ సొంత పనులకు వినియోగించుకుంటున్నారు. తాజాగా కర్నూలు జిల్లా కౌతాళం మండలం ఉరుకుంద ఈరన్న దేవాలయానికి కొందరు భక్తులు ఇంటింటికి రేషన్​ పంపిణీ చేసే వాహనంలో తరలివచ్చారు. ఆ వాహనాన్ని చూసిన భక్తులు ఒక్కసారిగా అవాక్కయ్యారు.

ఇంటింటికి రేషన్ పంపిణీ చేసేందుకు ప్రభుత్వం కేటాయించిన వాహనాలను కొందరు తమ సొంత పనులకు వినియోగించుకుంటున్నారు. మరి కొందరు ఆపద సమయంలో ఎమర్జెన్సీ కింద వినియోగిస్తున్నారు. గతంలో కోసిగి మండల పరిధిలోని దుద్ది గ్రామంలో ఈ వాహనంలో గర్భిణిని ఆసుపత్రికి తరలించి శభాష్ అనిపించుకున్నారు. మంచికి ఉపయోగిస్తే బాగానే ఉంటుంది కానీ ఇలా సొంత పనులకు వినియోగించడంపై ప్రజలు ఆగ్రహం వ్యక్తం చేస్తున్నారు.

శ్రావణ మాసం సందర్భంగా కర్నూలు జిల్లాలోని జోహలాపురం గ్రామానికి చెందిన రేషన్ ట్రక్కులో ఓ కుటుంబం ఉరుకుందలోని ఈరన్న దేవాలయానికి వెళ్లారు. దర్శన అనంతరం కోసిగిలోని రేణుక ఎల్లమ్మ గుడి వద్ద సేద తీరుతుండగా మీడియా ప్రతినిధులు వారిని ఆరాతీశారు. వివరాలు అడిగి ఫొటోలు తీస్తుండగా ఫోన్​లు లాక్కుని అడ్డుకున్నారు. రేషన్ వాహనంలో ఇలా వెళ్లకూడదన్న నిబంధనలు ఉన్నప్పటికీ ఏమాత్రం భయం లేకుండా ప్రయాణిస్తూ ప్రశ్నించిన వారిపై దుర్భాషలాడారని తెలుస్తోంది. ఈ వాహన డ్రైవర్​పై అధికారులు చర్యలు తీసుకోవాలని డిమాండ్ చేశారు.

సామాజిక మాధ్యమాల్లో చిత్రాలు హల్​చల్..

ఈ వాహనం గ్రామాల మీదుగా వెళ్తుండగా కొందరు తీసిన ఫొటోలు సామాజిక మాద్యమాల్లో హల్​చల్​ చేస్తున్నాయి. సొంత పనులకు ఈ ట్రక్కును ఉపయోగించుకోవడంపై కొంతమంది వైకాపా కార్యకర్తలు ఆగ్రహం వ్యక్తం చేశారు.

ఇదీ చదవండి: