ఉద్యోగాలు ఇప్పిస్తామని చెప్పి డబ్బులు తీసుకుని ముఖం చాటేసిన సంఘటన కర్నూలు జిల్లాలో జరిగింది. మోసపోయామని గ్రహించిన బాధితులు పోలీసులను ఆశ్రయించారు.
ఏం జరిగిందంటే:
ఉలిందకొండ, ప్యాపిలి, పెరవలి గ్రామాలకు చెందిన ఐదుగురు నిరుద్యోగులకు ఓ ముఠా ఎర వేసింది. ఎంబీఏ, డిగ్రీ చదవిన శరత్‌బాబు, వినోద్‌కుమార్, నాగన్న, ప్రసన్న, బీఈడీ చేసిన సుధాకర్ ఈ ఉచ్చులో చిక్కుకున్నారు. తొలుత నాగన్నకు అందిన విజటింగ్ కార్డులోని చరవాణి నెంబర్‌కు సంప్రదించగా నవీన్కుమార్ అనే వ్యక్తి ఉద్యోగం ఇప్పిస్తానని, తన సొంత ఊరు నందికొట్కూరు అని తెలిపారు. వాట్సప్‌ ఐడీ చిత్రం ఓ రాజకీయ నేతది పెట్టుకున్నారు. దీంతో అతని మాటలు నమ్మి ఉద్యోగంపై ఆశలు పెట్టుకున్నారు.
బంగారంపై రుణం అందించే ఓ ప్రైవేటుకంపెనీలో ఉద్యోగాలు ఇప్పిస్తామని చెప్పారు. పీజీ చదివిన వారికి క్యాషియర్ పోస్టుకు 25 వేల రూపాయల జీతం, డిగ్రీ చదివిన వారికి గోల్డ్ అనలిస్టు పోస్టుకు 19 వేల రూపాయల జీతం ఇస్తామని నమ్మబలికారు. ఇంటర్వ్యూలు ఎప్పుడనేది హైదరాబాద్‌ నుంచి రాజు అనే వ్యక్తి ఫోన్ చేస్తాడని చెప్పారు. అదే విధంగా ఫోన్ కాల్ రావడంతో ఉద్యోగాలు నిజమేనని నమ్మిన నిరుద్యోగులు వేరువేరుగా నగదు బదిలీ చేశారు.
జనార్ధన్‌ అనే వ్యక్తి బ్యాంకు ఖాతాకు బదిలీ చేయాలని, ఇంటర్వ్యూలో అతనే కీలకమని చెప్పడంతో బాధితులు ఒక్కొక్కరు రూ.12,500 ఫోన్‌పే ద్వారా బదిలీ చేశారు. సెప్టెంబర్ పది నుంచి నవీన్కుమార్, రాజు చరవాణులు స్విచ్ఛాఫ్కావడంతో మోసపోయామని బాధితులు గ్రహించారు.
పోలీసులకు ఫిర్యాదు:
నవీన్కుమార్ చెప్పిన సంస్థ నందికొట్కూరు బ్రాంచ్కు వెళ్లి అతనిపై ఆరా తీయగా తమలాగే మరికొంత మంది మోసపోయారని తెలిసింది. కడప, అనంతపురం, ప్రకాశం జిల్లాల వారంతా జనార్థన్ ఖాతాకే నగదు బదిలీ చేసినట్లు బాధితులు తెలుసుకున్నారు. అందరూ కలిసి ఎస్పీ కార్యాలయంలో అర్జీ అందచేశారు. తమలాగే ఇంకెవరూ మోసపోకూడదని ఫిర్యాదు చేసినట్లు తెలిపారు. అప్పులు తెచ్చి నగదు కట్టామని పోలీసులు న్యాయం చేయాలని బాధితులు ఆవేదన వ్యక్తం చేస్తున్నారు.
ఇదీ చదవండి: లంక గ్రామాలకు ముంపు...
