'ఆన్లైన్ రమ్మీ కమ్మేస్తోంది' అంటూ 'ఈటీవీ భారత్'లో నిన్న కథనం ప్రచురితమైంది. ఈ కథనానికి ఏఐవైఎఫ్ రాష్ట్ర కార్యదర్శి లెనిన్ బాబు స్పందించారు. ఈ సందర్భంగా కర్నూలు జిల్లా డోన్ పట్టణంలో ఏఐవైఎఫ్ ఆధ్వర్యంలో ఆయన ధర్నా నిర్వహించారు. ఆన్లైన్ రమ్మీని నిషేధించి, విద్యార్థి, యువత భవిష్యత్తును కాపాడాలని డిమాండ్ చేశారు.
ఈ గేమ్ ఆడడం వల్ల విద్యార్థులు, యువత తప్పుదోవ పడుతున్నారని ఆరోపించారు. లక్షల రూపాయలు పోగొట్టుకుని అప్పుల పాలవుతున్నారని ఆవేదన వ్యక్తంచేశారు. ఇలాంటి వెబ్సైట్లను రద్దుచేసి యువత తప్పుదోవ పట్టకుండా ప్రభుత్వం కాపాడాలని కోరారు. ఈ ఆట వల్ల జరిగే నష్టాలపై విద్యార్థులకు కౌన్సెలింగ్ సెంటర్లు ఏర్పాటు చేయాలన్నారు. ఆన్లైన్ రమ్మీపై హైకోర్టులో పిటిషన్ వేసి ఈ వెబ్సైట్స్ను రద్దు చేసే వరకు పోరాడతామని లెనిన్ బాబు పేర్కొన్నారు.
