నోరూరించే 'క్యారెట్ పచ్చడి' - పది నిమిషాల్లో రెడీ చేసుకోవచ్చు!

క్యారెట్​తో ఆరోగ్యానికి ఎంతో మేలు - సులభంగా పచ్చడి పెట్టేయండి

How to Make Carrot Chutney : క్యారెట్​ అనగానే మనలో చాలా మంది ఉదయం లేదా సాయంత్రం తినే ఒక ఆరోగ్యకరమైన స్నాక్​గానే చూస్తారు. క్యారెట్​లో ఉండే విటమిన్ ఎ, కె, సి వంటివి ఆరోగ్యానికి ఎంతో మేలు చేస్తాయి. బరువు తగ్గడానికి ట్రై చేసే వారు క్యారెట్​ జ్యూస్​ చేసుకుని తాగుతుంటారు.

క్యారెట్​తో కర్రీ వండుకోవడం లేదా రెండు క్యారెట్లను ముక్కలుగా కోసి సాంబార్​లో వేసుకోవడం ఎక్కువ మంది వంటింట్లో చేసేదే! అయితే, ఎప్పుడూ ఒకేలా కాకుండా ఈ సారి కొత్తగా క్యారెట్ పచ్చడి ట్రై చేయండి. ఒక్కసారి ఈ స్టోరీలో చెప్పినట్లుగా క్యారెట్ పచ్చడి పెడితే సూపర్​ టేస్టీగా ఉంటుంది. పైగా ఈ పచ్చడి ఆరోగ్యానికి ఎంతో మంచిది. మరి ఇక ఆలస్యం చేయకుండా సింపుల్​గా క్యారెట్ పచ్చడి ఎలా చేయాలో ఓ లుక్కేయండి.

కావాల్సిన పదార్థాలు :

• క్యారెట్​ - పావు కేజీ

స్పెషల్​ పొడి కోసం :

• మెంతులు - అరటీస్పూన్
• ఆవాలు - అరటీస్పూన్
• పచ్చిశనగపప్పు - అరటీస్పూన్
• మినప్పప్పు - అరటీస్పూన్
• ఎండుమిర్చి - 4
• పచ్చిమిర్చి - 3
• ఇంగువ - చిటికెడు
• కొత్తమీర తరుగు - కొద్దిగా
• చింతపండు - చిన్న నిమ్మకాయ సైజంత

తాలింపు కోసం :

• ఆవాలు - అరటీస్పూన్​
• జీలకర్ర - అరటీస్పూన్
• ఎండుమిర్చి -1
• కరివేపాకు - 2

తయారీ విధానం :

• ముందుగా క్యారెట్​ శుభ్రంగా కడిగి ఒక పొడి వస్త్రంతో తుడవండి. ఆపై గ్రేటర్​ సహాయంతో తురుముకోండి.
• క్యారెట్​ తురుముని ఒక గిన్నెలోకి తీసుకోండి.
• ఇప్పుడు స్టవ్​పై పాన్​ పెట్టి కొద్దిగా ఆయిల్​ వేయండి. నూనె వేడయ్యాక మెంతులు, ఆవాలు వేసి వేపండి. మెంతులు ఎర్రగా వేగిన తర్వాత పచ్చిశనగపప్పు, మినప్పప్పు వేసి వేపండి.
• పచ్చిశనగపప్పు ఎర్రగా వేగిన తర్వాత ఎండుమిర్చి వేసి కాసేపు ఫ్రై చేయండి. తర్వాత స్టవ్​ ఆఫ్ చేసి ఇంగువ, పచ్చిమిర్చి, కొత్తిమీర తరుగు, చింతపండు వేసి కలపండి.
• తర్వాత వీటన్నింటినీ ఒక మిక్సీ జార్లో వేసి మెత్తగా గ్రైండ్​ చేసుకోండి.
• తర్వాత ఒక పాన్​లో ఆయిల్​ వేసి కాస్త నూనె వేసి వేడి చేయండి. ఇందులో ఆవాలు, జీలకర్ర, ఎండుమిర్చి, కరివేపాకు వేసి వేపండి.
• అనంతరం క్యారెట్​ తురుము, గ్రైండ్​ చేసుకున్న స్పెషల్​ పొడి, రుచికి సరిపడా ఉప్పు వేసి కలుపుకోండి.
• ఓ 5 నిమిషాల తర్వాత స్టవ్​ ఆఫ్​ చేసి అరగంటపాటు అలా వదిలేయండి.
• అంతే ఇలా సింపుల్​గా చేసుకుంటే టేస్టీ అండ్​ హెల్దీ క్యారెట్​ పచ్చడి మీ ముందుంటుంది.
• ఈ క్యారెట్​ పచ్చడి అన్నంతోనే కాకుండా ఇడ్లీ, దోశల్లోకి కూడా టేస్ట్​ అద్దిరిపోతుంది.
• క్యారెట్​ పచ్చడి నచ్చితే మీరు ఓ సారి ట్రై చేయండి.