గెలుపుకోసమే అన్ని ప్రయత్నాాలూ..
ఏకగ్రీవాలకు పెద్దపీట వేయాలని కొందరు నాయకులు ఒప్పందాలు కుదుర్చుకునేందుకు ప్రయత్నిస్తున్నారు. ఒత్తిళ్లు పెంచుతున్నారు. జిల్లాలో ఘర్షణ వాతావరణం అలముకుంటోంది. ఏకగ్రీవాలు చేయించుకోవాలని ఒక వర్గం ప్రయత్నిస్తోంటే.. పోటీ చేసి సత్తా నిరూపించుకోవాలని మరో వర్గం నాయకులు ప్రయత్నిస్తున్నారు. ఆధిపత్యం కోసం వివిధ ప్రాంతాల్లో చేస్తున్న బెదిరింపులు, ప్రలోభాల ప్రభావం రాబోయే పరిషత్‌ ఎన్నికల నాటికి ఏరూపు దాల్చుతుందో అన్న ఆందోళనకు బీజం పడుతోంది. ప్రశాంత వాతావరణంలో ఎన్నికలు నిర్వహించాలన్న ఎన్నికల కమిషన్‌ ఆదేశాలకు భిన్నమైన పరిస్థితులు పలు పంచాయతీల్లో ఉత్పన్నమవుతున్నాయి. స్థానిక సంస్థల ఎన్నికలను అధికార వైకాపాతో పాటు ప్రధాన ప్రతిపక్షమైన తెదేపా, జనసేనలు ప్రతిష్ఠాత్మకంగా తీసుకున్నాయి.
బెదిరింపులు.. దాడులు:
గతంలో పార్టీలకు అతీతంగా వర్గపోరుతో సతమతమయ్యే గ్రామాల్లో మాత్రమే గెలుపు కోసం పెద్ద ఎత్తున పైరవీలు, ప్రలోభాల పర్వాలు ఉండేవి. ప్రసుత ఎన్నికల విషయంలో ప్రధాన రాజకీయ పక్షాలు పట్టుదలతో వ్యవహరిస్తుండటంతో తాజాగా బెదిరింపులు, దాడుల వంటివి తెరపైకి వచ్చాయి. కొన్ని నియోజకవర్గాల్లో అధికారం చేతులో ఉన్న వ్యక్తులు పార్టీ అధినేతను ప్రసన్నం చేసుకునే క్రమంలో మెజార్టీ పంచాయతీలను తమఖాతాలోకి చూపించుకునేందుకు తమదైన శైలిలో వ్యవహరిస్తున్నారు.
పాత ఒప్పందాలకు నీళ్లు..
కొవిడ్‌ ముందు నిర్వహించాల్సిన పరిషత్‌, పురపాలిక ఎన్నికల సందర్భంగా చేసుకున్న ఒప్పందాలను సైతం తుంగలోకి తొక్కేస్తున్నారు. ముందస్తు చేసుకున్న ఒప్పందం పాటించలేదనే కారణంతో పెనుగంచిప్రోలు మండలం లింగగూడెంలో ఓవ్యక్తి ఆత్మహత్యా యత్నానికి పాల్పడ్డారు. కొన్ని పంచాయతీల్లో నామపత్రాలు దాఖలు చేయకుండా అభ్యర్థులను భయభ్రాంతులకు గురిచేస్తున్నారు.
కైకలూరు మండలం శృంగవరప్పాడులో ఇరు వర్గాల మధ్య చోటు చేసుకున్న దాడిలో పలువురు గాయపడ్డారు. నామినేషన్‌ను వేయనీయకుండా అడ్డుకునే క్రమంలో దాడులకు వెనుకాడటం లేదు. జి.కొండూరు మండలానికి ఓ అభ్యర్థిని తనను నామినేషన్‌ వేయకుండా అడ్డగించారని ఎన్నికల సంఘానికి ఫిర్యాదు చేశారు.
ఏకగ్రీవాలకు సహకరించకుండా బరిలో నిలుస్తున్నారన్న కారణంతో ఇబ్రహీంపట్నం మూలపాడు, వత్సవాయి మండలం తాళ్లూరు, తదితర ప్రాంతాల్లో ఘర్షణలు చోటుచేసుకున్నాయి. కొన్ని ప్రాంతాల్లో బాధ్యతాయుతంగా వ్యవహరించాల్సిన అధికార యంత్రాంగంలోని కొందరు ఏకపక్షంగా వ్యవహరిస్తున్నారన్న ఫిర్యాదులు వెల్లువెత్తుతున్నాయి.
ఎనికేపాడు, మైలవరం, జగ్గయ్యపేట పరిధిలో అభ్యర్థుల నామినేషన్లను తిరస్కరించే ప్రయత్నం చేయడంతో పెద్ద ఎత్తున వారి మద్దతుదారులు ఆందోళన చేయడంతో పాటు న్యాయం కోసం ఎన్నికల కమిషన్‌ను ఆశ్రయించే పరిస్థితులు ఎదురవుతున్నాయి.
అభ్యర్థులను అడ్డుకునేందుకు ప్రయత్నాలు:
పాత కేసులను తిరగదోడటం, సకాలంలో ధ్రువీకరణ పత్రాలు అందకుండా చేయడం వంటి చర్యలతో వారిని తమదారికి తెచ్చుకుంటున్నారు. వీటికి లొంగని వారిని ఊహించని మొత్తాలను ఆఫర్ చేయడంతో పాటు వారి భవిష్యత్‌ను రంగులమయంగా చూపిస్తున్నారు. ఈ కారణంతోనే తొలిదశగా నామినేషన్ల ప్రక్రియ పూర్తయిన విజయవాడ డివిజన్‌ పరిధిలో గట్టిగా పోటీలో నిలుస్తారనుకున్న కొందరు అభ్యర్థులు చడీచప్పుడు లేకుండా ఆఖరు నిమిషంలో నామినేషన్లు దాఖలు చేయకుండా బరి నుంచి వైదొలిగారు.
తప్పుకున్న వారికి అర కోటి ఆఫర్..
కీలక గ్రామాల్లో సర్పంచి పదవిని వదులుకుంటే రూ.అరకోటి వరకూ ఇస్తామనే బేరసారాలు చోటుచేసుకుంటున్నట్టు ప్రచారం ఉంది. జిల్లాలో నాలుగు దశల్లో నామినేషన్ల ప్రక్రియ పూర్తవడంతో పాటు ఉపసర్పంచి పదవి ఎన్నిక పూర్తయ్యే వరకూ చోటుచేసుకునే ఎత్తుకు పైఎత్తులపై అధికార యంత్రాంగం దృషి సారించి ఎటువంటి అవాంఛనీయ సంఘటనలకు ఆస్కారం లేకుండా చూడాలనేది సామాన్య ఓటరు అభిమతంగా ఉంది.
ఇదీ చదవండి:
