బంక్​లో పెట్రోల్​కు బదులుగా నీళ్లు.. కేసు నమోదు

ఓ పెట్రోల్ బంక్ సిబ్బంది నిర్వాకం వాహనదారులను ఆగ్రహానికి గురి చేసింది. ఇటీవల కురిసిన వర్షాలకు బంక్​లో పెట్రోల్ నిల్వ చేసే ట్యాంక్​లోకి నీరు చేరింది. అది గమనించని బంక్ సిబ్బంది వినియోగదారుల వాహనాల్లో నీళ్లను నింపారు. వాహనాలు ముందుకు కదలక మొరాయించాయి. దాంతో అసలు విషయం బయటపడింది. బాధితుల ఫిర్యాదుతో పోలీసులు కేసు నమోదు చేశారు.

విజయవాడలోని ఆటోనగర్​లో ఓ బంక్​ నుంచి పెట్రోల్​కు బదులుగా నీళ్లు వచ్చాయి. హిందుస్తాన్ పెట్రోలియంకు చెందిన ఓ ప్రైవేటు బంక్​లో ఇంధనం పోయించుకున్న వాహనాలన్నీ మరమ్మతులకు గురయ్యాయి. ఇంధనం బయటకు తీసి పరిశీలించగా.. అంతా నీరు ఉండటంతో వాహనదారులు పోలీసులకు ఫిర్యాదు చేశారు. దీనిపై బంక్​ యాజమాన్యాన్ని ప్రశ్నించగా... ఇటీవల కురిసిన వర్షాలకు పెట్రోలు ట్యాంక్​లోకి నీళ్లు వచ్చినట్లు తెలిపారు. ఈ వ్యవహారంపై పోలీసులు కేసు నమోదు చేశారు.

ఇదీ చదవండి: డోకిపర్రు ఆలయానికి రావటం ఎంతో ఆనందం: పవన్