కృష్ణా జిల్లా నూజివీడు ట్రిపుల్ ఐటీ అమ్మాయిల హాస్టల్లో జరిగిన ఘటనపై ఉపకులపతి హేమచంద్రారెడ్డి స్పందించారు. విద్యార్థులు, సిబ్బందిపై చర్యలు తీసుకున్నట్లు తెలిపారు. విద్యార్థులకు మైనారిటీ తీరని కారణంగా వారి తల్లిదండ్రులను పిలిపించి కౌన్సెలింగ్ ఇచ్చి.. విద్యార్థులను పంపించామని అన్నారు. భవిష్యత్లో ఇలాంటి ఘటనలు జరుగకుండా పటిష్టమైన చర్యలు చేపడుతున్నామన్నారు. ఘటనలో సెక్యూరిటీ అజాగ్రత్త స్పష్టంగా తెలుస్తోందని ఆగ్రహం వ్యక్తం చేశారు. టీనేజ్లో విద్యార్థులు ఆకర్షణకు గురై బంగారు భవిష్యత్ నాశనం చేసుకోవద్దని హితవు పలికారు.
అసలేం జరిగిందంటే..?
విద్యార్థినుల వసతి గృహాలుండే చోట సెక్యూరిటీ ఎక్కువగా ఉంటుంది. చీమ చిటుక్కుమన్నా తెలిసిపోతుంది. నూజివీడు ట్రిపుల్ ఐటీలో మాత్రం కిటికీ గ్రిల్స్ పగలగొట్టినా వినిపించలేదు. ట్రిపుల్ ఐటీ అమ్మాయిల హాస్టల్లోకి అదే క్యాంపస్కు చెందిన ఓ విద్యార్థి (బాలుడు) ప్రవేశించాడు. తనకు తెలిసిన అమ్మాయి గదికి వెళ్లాడు. 11 గంటలు గదిలోనే ఉన్నాడు. అయినా ఈ విషయాన్ని యాజమాన్యం దృష్టికి ఎవరూ తీసుకెళ్లలేదు. ఎలాగోలా అధికారులకు సమాచారం అందింది. సిబ్బందికి విషయం తెలిసిన వెంటనే గునపాలతో ఆ గది వైపు వెళ్లారు. తాళం పగలగొట్టారు. తలుపు తెరవగానే గదిలో అమ్మాయి కనిపించింది. 'ఏంటి తల్లీ తాళం వేసిన గదిలో ఉన్నావ్' అని అడిగితే... ఆ విద్యార్థిని నుంచి సమాధానం లేదు. సెక్యూరిటీకి సిబ్బంది మంచాలను పక్కకు జరిపి చూశారు. గదిలోని ఓ మంచం కింద ఉన్నాడో విద్యార్థి. విద్యార్థులు, సెక్యూరిటీ సిబ్బందిపై చర్యలు తీసుకున్నట్లు ఉపకులపతి హేమచందారెడ్డి తెలిపారు.
