తెలంగాణ అక్రమ ప్రాజెక్టులు పూర్తైతే.. ఎడారిగా ఏపీ: కొల్లు రవీంద్ర

అనుమతులు లేకుండా కృష్ణా, గోదావ‌రి న‌దుల‌పై తెలంగాణ ఎనిమిది అక్రమ ప్రాజెక్టులను నిర్మిస్తోందని మాజీమంత్రి కొల్లు రవీంద్ర ఆరోపించారు. వారు ప్రాజెక్టులు నిర్మిస్తుంటే ప్రభుత్వం ఎందుకు పట్టించుకోవట్లేదని.. కేంద్ర ప్రభుత్వం సైతం ధృతరాష్ట్రుడి పాత్ర పోషిస్తోందని మండిపడ్డారు.

రాష్ట్రానికి న్యాయంగా రావాల్సిన నీటి హక్కులను సీఎం జగన్.. తెలంగాణకు కట్టబెడుతున్నారని మాజీ మంత్రి కొల్లు ర‌వీంద్ర దుయ్యబట్టారు. కృష్ణా, గోదావ‌రి న‌దుల‌పై తెలంగాణ‌ ప్రభుత్వం దాదాపు 8 ప్రాజెక్టుల‌ను నిర్మిస్తుంటే ఏపీ ప్రభుత్వం పట్టించుకోవడం లేదన్నారు. తెలంగాణ అక్రమ ప్రాజెక్టులు పూర్తైతే దిగువ రాష్ట్రమైన ఆంధ్రప్రదేశ్ ఎడారిగా మారుతుందని ఆవేదన వ్యక్తంచేశారు.

తెలంగాణ సర్కార్ పాలమూరు, రంగారెడ్డి, డిండి, భక్త రామదాసు, నెట్టెంపాడు, కల్వకుర్తి తదితర ప్రాజెక్టుల నిర్మాణం చేపట్టిందని కొల్లు వివరించారు. ఈ ప్రాజెక్టులకు కేంద్ర జలసంఘం, కృష్ణానది యాజమాన్యబోర్డు, అపెక్స్ కౌన్సిల్ అనుమతులు లేవని, బచావత్ ట్రిబ్యునల్ నీటి కేటాయింపులు లేవని చెప్పారు. అనుమతులు లేకుండా తెలంగాణ ప్రభుత్వం ఇన్ని ప్రాజెక్టులు నిర్మాణం చేస్తుంటే ప్రభుత్వానికి కనిపించడం లేదా అని మాజీ మంత్రి నిలదీశారు.

తెలంగాణ ప్రభుత్వం ఇన్ని ప్రాజెక్టులు నిర్మిస్తుంటే కేంద్రం ఎందుకు ధ్రుతరాష్ట్రుడి పాత్ర పోషిస్తోందని ప్రశ్నించారు. వెంటనే కృష్ణానదీ యాజమాన్య బోర్డు పరిధిని నోటిఫై చేసి తెలంగాణ నిర్మిస్తున్న అక్రమ ప్రాజెక్టులను నిలుపుదల చేయాలని డిమాండ్ చేశారు. రైతాంగ ప్రయోజ‌నాల‌ను తెలంగాణకు తాక‌ట్టు పెడితే స‌హించేది లేదని హెచ్చరించారు.

ఇదీ చూడండి: