Yanamala comments on Bulk Drug Park: కాకినాడ సెజ్‌లో ఏర్పాటు చేసే బల్క్ డ్రగ్ పార్క్ వల్ల పర్యావరణానికి తీవ్ర ముప్పని తెదేపా సీనియర్‌ నేత మాజీమంత్రి యనమల రామకృష్ణుడు.. కేంద్రానికి ఫిర్యాదు చేశారు. ప్రతిపాదనను తక్షణమే విరమించుకోవాలని కేంద్ర రసాయనాలు, ఎరువుల మంత్రిత్వశాఖ సంయుక్త కార్యదర్శికి ఫిర్యాదు చేసిన లేఖలో పేర్కొన్నారు. లేఖ ప్రతులను జాతీయ హరిత ట్రిబ్యునల్, రాష్ట్ర ప్రభుత్వ ప్రధాన కార్యదర్శులకు పంపారు. ఫార్మా పార్క్ ఏర్పాటు వల్ల మత్స్యకారుల జీవనోపాధిపై తీవ్ర ప్రభావం పడుతుందన్నారు. దాదాపు 300 హేచరీలు ఇక్కడ ఉన్నాయని.. ఫార్మా పార్క్ ఏర్పాటు వల్ల నీరు, నేల, సముద్రం కలుషితమై రైతులు, మత్స్య కారుల జీవనోపాధి దెబ్బతింటుందన్నారు. ఫార్మా పరిశ్రమ వద్దంటూ మత్స్యకారులు ఇప్పటికే ఆందోళనలు చేస్తున్నారని కేంద్రం దృష్టికి తీసుకెళ్లారు.
బల్క్ డ్రగ్ పార్క్ ఏర్పాటు చేస్తే భవిష్యత్‌ తరాలపై ప్రభావం చూపుతుందని యనమల తెలిపారు. ప్రజలు అంగవైకల్యం, మలబద్ధకం, అతిసారం, మగత, నొప్పి, చర్మ జీర్ణశయ వ్యాధులకు గురైయ్యే ప్రమాదం ఉందని పేర్కొన్నారు. భూములిచ్చిన రైతులకు పరిహారం చెల్లింపు కూడా ఇంకా పెండింగ్‌లోనే ఉందని తెలిపారు. ఈ ప్రాజెక్టు పక్కనే ఉన్న హెటెరో డ్రగ్స్‌ ఇప్పటికే నిబంధనలు ఉల్లంఘించినందుకు ఎన్జీటీ రూ. 6.94 కోట్ల పెనాల్టీ విధించిందన్నారు. వాస్తవ పరిస్థితుల దృష్ట్యా బల్క్ డ్రగ్ పార్క్ ఏర్పాటు ప్రతిపాదనను విరమించుకోవాలని యనమల రామకృష్ణుడు కోరారు.
Bulk Drug Park: రాష్ట్రానికి బల్క్ డ్రగ్ పార్కును కేటాయిస్తూ కేంద్ర ప్రభుత్వం ఆమోదాన్ని తెలియజేసింది. కాకినాడ జిల్లా తొండంగి మండలం కొత్త పెరుమాళ్లపురం, కోదాడ గ్రామాల పరిధిలో ఈ పార్కుకు అనుమతిస్తున్నట్లు కేంద్ర రసాయనాలు, ఎరువులు ఔషధ మంత్రిత్వశాఖ జాయింట్ సెక్రటరీ ఎన్. యువరాజ్.. సీఎస్ సమీర్ శర్మకు లేఖ రాశారు. అనుమతి లేఖ అందిన వారం రోజుల్లోగా ప్రాజెక్టు ఏర్పాటు కోసం అంగీకారం తెలియజేయాల్సిందిగా అందులో పేర్కొన్నారు. అలాగే ఈ ప్రాజెక్టు మేనేజ్‌మెంట్‌ ఏజెన్సీగా వ్యవహరిస్తున్న ఇఫ్కీకి... 90 రోజుల్లోగా ప్రాజెక్టు సవివర నివేదిక సమర్పించాల్సిందిగా సూచించారు. కేంద్రం సూచించిన మార్గదర్శకాలతోపాటు రాష్ట్ర ప్రభుత్వం ప్రకటించిన ప్రోత్సాహకాలను అందించాల్సిందిగా లేఖలో పేర్కొన్నారు. మరోవైపు బల్క్ డ్రగ్ పార్కు ఏర్పాటులో భాగంగా కేంద్రం గ్రాంట్ ఇన్ ఎయిడ్‌గా వెయ్యి కోట్లు ఆర్ధిక సాయం అందించనుంది. దేశ వ్యాప్తంగా బల్క్ డ్రగ్ పార్కుల కోసం 13 రాష్ట్రాలు పోటీ పడితే అందులో 3 రాష్ట్రాలు మాత్రమే వీటిని దక్కించుకున్నాయి. దక్షిణాది రాష్ట్రాల్లో తెలంగాణ, తమిళనాడు, కర్ణాటక రాష్ట్రాలు బల్క్ డ్రగ్ పార్కు కోసం పోటీ పడ్డాయి.
ఇవి చదవండ:
