Nuvvula Karam Podi in Telugu : వేడివేడి ఇడ్లీ, దోశల్లోకి పల్లీ చట్నీ ఉన్నా కొంతమందికి కారం పొడి ఉండాల్సిందే! కారం పొడితో ఏ టిఫెన్ తిన్నా తృప్తిగా ఉంటుందని చెబుతుంటారు. అయితే, మీ కోసమే బ్రేక్ఫాస్ట్లోకి కమ్మటి నువ్వుల కారం పొడి రెసిపీ తీసుకొచ్చాం. ఈ నువ్వుల కారం పొడి ఇడ్లీ, అట్లలోకి సూపర్ టేస్టీగా ఉంటుంది. మరి ఈజీగా ఈ నువ్వుల కారం పొడి ఎలా ప్రిపేర్ చేసుకోవాలో ఇప్పుడు చూద్దాం.
కావాల్సిన పదార్థాలు :
- తెల్ల నువ్వులు - అర కప్పు
- బ్యాడిగి మిర్చి - 12
- గుంటూరు మిర్చి - 10
- ఎండుకొబ్బరి ముక్కలు - పావు కప్పు
- శనగపప్పు - పావు కప్పు
- మినప్పప్పు - పావు కప్పు
- జీలకర్ర - అర టేబుల్స్పూన్
- ఉప్పు - రుచికి సరిపడా
- వెల్లుల్లి రెబ్బలు - 20
- చింతపండు - గోలి సైజంత
- బెల్లం తురుము - టేబుల్ స్పూన్
పిండిలో ఈ ఒక్కటి వేస్తే చాలు - చపాతీలు ఎన్ని గంటలైనా మెత్తగా ఉంటాయి!
తయారీ విధానం :
- ముందుగా స్టవ్పై పాన్ పెట్టుకొని నువ్వులు వేయించుకోవాలి.
- అయితే ఇక్కడ నువ్వులను త్వరగా వేయించుకుంటే కారంపొడి అంత రుచిగా ఉండదనే విషయాన్ని గుర్తుంచుకోవాలి. కాబట్టి స్టవ్ లో-ఫ్లేమ్లో అడ్జస్ట్ చేసి గరిటెతో కలుపుతూ అవి కాస్త రంగు మారే వరకు వేయించుకోవాలి. ఇందుకు దాదాపు 15 నుంచి 18 నిమిషాల టైమ్ పట్టొచ్చు.
- ఆపై నువ్వులను ఒక ప్లేట్లోకి తీసుకోవాలి.
- ఇప్పుడు అదే పాన్లో గుంటూరు, బ్యాడిగి ఎండుమిర్చి వేసి అవి ఒక పొంగు వచ్చే వరకు వేపుకోవాలి. తర్వాత వాటిని నువ్వులు వేసుకున్న ప్లేట్లోకి తీసుకోవాలి.
- (ఇక్కడ నువ్వుల కారం పొడిలో బ్యాడిగి మిర్చి వాడడం వల్ల కారం పొడికి మంచి రంగు, పరిమళం వస్తుంది. అలాగే కారం తక్కువగా ఉంటుంది. అదే, మీరు కారం పొడి స్పైసీ ఉండాలనుకుంటే గుంటూరు మిర్చిని పెంచుకోవచ్చు.)
- తర్వాత అదే పాన్లో ఎండుకొబ్బరి ముక్కలు, మినప్పప్పు, శనగపప్పు, జీలకర్ర వేసుకొని, లో-ఫ్లేమ్లో లైట్ గోల్డెన్ రంగులోకి మారేంత వరకు వేయించుకోవాలి.
- అనంతరం అందులో ఉప్పు, వెల్లుల్లి రెబ్బలు వేసుకొని పప్పులు పూర్తిగా ఎర్రగా వేగేంత వరకు వేపుకోవాలి.
- పప్పులన్నీ దోరగా వేగడానికి 25 నుంచి 30 నిమిషాల టైమ్ పట్టొచ్చు. ఆపై వీటిని ఒక ప్లేట్లోకి తీసుకొని చల్లారనివ్వాలి.
- తర్వాత మిక్సీ జార్ తీసుకొని మొదటగా వేయించుకొని పక్కన ఉంచుకున్న ఎండుమిర్చి, చల్లారిన పప్పుల మిశ్రమం వేసుకొని మెత్తని పొడిలా మిక్సీ పట్టుకోవాలి.
- ఆపై అందులో ముందుగా వేయించుకొని పక్కన పెట్టుకున్న నువ్వులలో రెండు చెంచాలు పక్కకు తీసి మిగతా వాటిని వేసుకోవాలి. అలాగే బెల్లం తురుము, చింతపండు వేసుకొని మరోసారి ఆ మిశ్రమాన్ని మెత్తగా గ్రైండ్ పట్టుకోవాలి.
- ఇప్పుడు మిక్సీ పట్టుకున్నాక చివరగా పక్కకు తీసుకున్న 2 చెంచాల నువ్వులు అందులో వేసుకొని కలుపుకోవాలి. అంతే ఇలా సింపుల్గా చేసుకుంటే అద్దిరిపోయే "నువ్వుల కారం పొడి" రెడీ!
- ఇలా కొన్ని నువ్వులు కలుపుకోవడం వల్ల తినేటప్పుడు అక్కడక్కడా అవి పంటికి తగులుతూ కారం పొడి చాలా టేస్టీగా అనిపిస్తుంది!
- ఈ నువ్వుల కారం పొడి నచ్చితే మీరు ఓసారి ఇంట్లో ట్రై చేయండి!
పూరీలు నూనె పీల్చకుండా పొంగాలంటే పిండిలో ఇదొక్కటి కలిపితే చాలు! - సింపుల్ ట్రిక్
గంటల కొద్ది మెత్తగా ఉండే "సొరకాయ చపాతీ" - మీ పిల్లలు ఒక్కటి కూడా మిగల్చరు!
