కృష్ణాజిల్లాలో కొవిడ్ బాధితులకు చికిత్స అందించే ఆస్పత్రుల్లో ఆక్సిజన్ కొరత లేకుండా 24 గంటలు పర్యవేక్షణ చేస్తున్నామని జిల్లా కొవిడ్ నోడల్ ఆఫీసర్ జేసీ ఎల్.శివశంకర్ అన్నారు. ప్రత్యేక ఆక్సిజన్ మానిటరింగ్ సెల్ ద్వారా చర్యలు తీసుకుంటున్నామని చెప్పారు. ఆక్సిజన్ సరఫరా, వినియోగం తదితర అంశాలపై సంబంధింత అధికారులతో సమీక్షించారు. అనంతరం విజయవాడలోని గ్యాస్ ఏజెన్సీ ఫిల్లింగ్ పాయింట్ను ఆకస్మిక తనిఖీ చేశారు. ఈ నెల 4,5 తేదీల్లో కొవిడ్ ఆస్పత్రుల్లో ఆక్సిజన్ సరఫరాలో సమస్య తలెత్తిందని.. సకాలంలో చర్యలు తీసుకోవటం వల్ల ఇబ్బందులు అధిగమించామని చెప్పారు.
రాష్ట్రంలోనే కాక ఇతర రాష్ట్రాల నుంచి ప్రత్యేక వాహనాలతో గ్రీన్ ఛానెల్ ద్వారా ఆక్సిజన్ సిలిండర్లను తీసుకువస్తున్నామని జేసీ తెలిపారు. విశాఖ స్టీల్ ప్లాంటు నుంచి అందాల్సిన ఆక్సిజన్ సాంకేతిక సమస్యల కారణంగా ఆగిపోతే.. ప్రైవేటు కంపెనీ నుంచి 20 మెట్రిక్ టన్నులు కొనుగోలు చేసి ఆస్పత్రులకు సరఫరా చేశామన్నారు. ప్రాణవాయువు సరఫరా ప్రక్రియలో ఎటువంటి లోటుపాట్లు జరగకుండా అర్ధరాత్రి కూడా తనిఖీలు నిర్వహిస్తున్నామని చెప్పారు. విజయవాడలో సెంట్రలైజ్డ్ఆక్సిజన్ యూనిట్ను సిద్ధంగా ఉంచినట్లు చెప్పారు. ఆక్సిజన్ సిలిండర్లకు కృత్రిమ కొరత సృష్టించి.. నల్ల బజారుకు తరలిస్తే కఠిన చర్యలు తప్పవని జేసీ శివశంకర్ హెచ్చరించారు.
ఇదీ చదవండి: కరోనా లక్షణాలు కనిపిస్తే.. వెంటనే కొవిడ్ కేర్ సెంటర్లకు తరలించాలి: బొత్స
