తక్కువ సమయంలో అత్యంత పారదర్శకంగా ఉద్యోగాలు ఇవ్వడం గొప్ప విషయమని సీఎం జగన్ అన్నారు. లక్షా 40 వేల మందికి శాశ్వత ప్రభుత్వ ఉద్యోగాలు రావడం ఓ రికార్డుగా తెలిపారు. ప్రతి 2 వేలమందికి ఒక సచివాలయం ఏర్పాటు చేసి ఉద్యోగాలు ఇచ్చామని తెలిపారు. ప్రతి గ్రామానికి 10 నుంచి 12 కొత్త ఉద్యోగాలు ఇవ్వగలిగామన్నారు. విజయవాడలో ఏర్పాటు చేసిన సభలో సీఎం.. స్వయంగా వార్డు, సచివాలయ ఉద్యోగులకు నియామక పత్రాలు అందించారు. ఈ సందర్భంగా పలువురు భావోద్వేగానికి గురయ్యారు.
గ్రామ,సచివాలయ ఉద్యోగులు ప్రభుత్వానికి రెండు కళ్లు
నాలుగు నెలలు గడవకముందే 4 లక్షల పైచిలుకు ఉద్యోగాలు ఇచ్చామని ముఖ్యమంత్రి తెలిపారు. లంచాలు, వివక్ష లేని పారదర్శక పాలనకు సహకరించాలని కోరారు. ప్రజలకు సేవలందించడానికే ఈ ఉద్యోగాలు చేస్తున్నామని గుర్తుపెట్టుకోవాలని సూచించారు. అవినీతి లేని పాలన కోసం గ్రామాల్లో అందరూ ఎదురుచూస్తున్నారని పేర్కొన్నారు. గ్రామ, సచివాలయ ఉద్యోగులు ప్రభుత్వానికి రెండు కళ్లుగా సీఎం అభివర్ణించారు. అధికారం చలాయించొద్దని ప్రజలకు అంతా సేవ చేయాలని సూచించారు.
ప్రతీ గ్రామ వాలంటీర్‌కు ఒక స్మార్ట్ఫోన్ ...
గ్రామాల్లో ప్రతి 50 ఇళ్లకు ఒక వాలంటీర్‌ను తీసుకొచ్చామన్న ముఖ్యమంత్రి... 72 గంటల్లో ఒక సమస్యను పరిష్కరిస్తే వారికి ఎంతో ఆనందంగా ఉంటుందని అభిప్రాయపడ్డారు. అక్టోబర్‌ 2 నుంచి కొత్త ఉద్యోగులు విధుల్లో చేరబోతున్నారని.. ప్రతి గ్రామ వాలంటీర్‌కు ఒక స్మార్ట్ఫోన్ ఇస్తామని సీఎం చెప్పారు. డిసెంబర్‌ మొదటి వారానికల్లా స్మార్ట్‌ఫోన్లతో పాటు పరికరాలు పంపిణీ చేస్తున్నట్లు ప్రకటించారు.
ఒక్క ఫిర్యాదు కూడా అందకుండా పని చేసిన అధికారులకు అభినందనలు..
జనవరి 1 నుంచి గ్రామాల్లో 500 సేవలు పూర్తిగా అందుబాటులోకి వస్తాయని సీఎం స్పష్టం చేశారు. అర్హులైన ప్రతిఒక్కరికి ప్రభుత్వ సంక్షేమ పథకాలు అందాలన్నది గుర్తుంచుకోవాలని సీఎం సూచించారు. వ్యవస్థలోకి మార్పు తీసుకొస్తారన్న నమ్మకం ఉందని పేర్కొన్నారు. గొప్ప కార్యక్రమాన్ని విజయవంతంగా పూర్తిచేశారంటూ అధికారులను అభినందించారు. ఒక్క ఫిర్యాదూ రాకుండానే నియామకాలను పూర్తి చేశారని ప్రశంసించారు.
