గుంటూరు జిల్లా మంగళగిరి-తాడేపల్లి కార్పొరేషన్ పరిధిలో ఇళ్ల తొలగింపు ఉద్రిక్తంగా మారింది. రోడ్డు విస్తరణ పేరుతో.. గత 30 ఏళ్లుగా ప్రభుత్వ స్థలంలో ఉంటున్న వారిని అధికారులు బలవంతంగా తొలగించారు. అధికారుల తీరును నిరసిస్తూ బాధితులు మంగళగిరి - విజయవాడ రహదారిపై బైఠాయించారు. దీంతో సుమారు మూడు కిలోమీటర్ల మేర వాహనాలు నిలిచిపోయాయి.
విషయం తెలుసుకున్న పోలీసులు సంఘటనా స్థలానికి చేరుకుని బాధితులతో చర్చించారు. తాము గత 30 ఏళ్లుగా ఇక్కడే ఉంటున్నామని, ఇంటి పన్ను, విద్యుత్ బిల్లులు అన్నీ సకాలంలోనే చెల్లిస్తున్నామని బాధితులు చెప్పారు. తమ వేదన పట్టించుకోకుండా.. అధికారులు కులం పేరుతో తిడుతున్నారని ఆరోపించారు.
గత ఎన్నికల సమయంలో స్థానిక శాసనసభ్యుడు ఆళ్ల రామకృష్ణారెడ్డి తమ ఇళ్లను తొలగించబోమని హామీ ఇచ్చి, ఇప్పుడు మోసం చేశారని ఆవేదన వ్యక్తం చేశారు. ఎమ్మెల్యే ఆర్కే కు వ్యతిరేకంగా నినాదాలు చేశారు. బాధితుల ఆందోళనకు తెలుగుదేశం పార్టీ నేతలు మద్దతు ప్రకటించారు. ముఖ్యమంత్రి జగన్ నివాసం సమీపంలోని అమరారెడ్డి నగరవాసులకు ఇచ్చిన విధంగానే.. వీళ్లకూ పరిహారం ఇవ్వాలని తెదేపా నేతలు డిమాండ్ చేశారు.
