మిర్చి అధికంగా సాగయ్యే రాష్ట్రాల్లో ఒకటైన ఆంధ్రప్రదేశ్‌లో.... గతేడాది 54 లక్షల ఎకరాల్లో పంట పండించారు. దిగుబడులు ఆశాజనకంగా ఉండటం, మంచి ధర పలకడంతో.... ఈసారి పంట విస్తీర్ణం మరో 15 శాతం పెరుగుతుందని అధికారులు అంచనా వేశారు. పత్తి సహా ఇతర పంటలు వేసే రైతులూ మిర్చికి మారే సూచనలున్నాయి. పంటను తీవ్రంగా దెబ్బతీసే జెమిని వైరస్‌ను తట్టుకునే కొన్నిరకాల విత్తనాల వాడకం వల్ల గత ఏడాది మంచి దిగుబడులు వచ్చాయి.
ఇప్పుడు ఆ రకం విత్తనాలకు డిమాండ్ అమాంతం పెరిగిపోయింది. ఆ రకమే కావాలని రైతులు కూడా అడుగుతుండటంతో... విత్తన సంస్థలు ధరలు భారీగా పెంచేశాయి. గతంలో 10 గ్రాముల విత్తన ప్యాకెట్‌ రూ.700 ఉండగా..... ఈసారి రూ.12 వందలకు చేరిందని రైతులు వాపోతున్నారు. డిమాండ్ ఉన్న విత్తన రకాలను కొందరు వ్యాపారులు ఎంమ్మార్పీ కంటే అధిక ధరలకు విక్రయిస్తున్నారు. కిలో రూ.81 వేలు ఉన్న విత్తనాల ధరను.... రూ.లక్షా 30 వేలకు అమ్ముతున్నారు.
బ్యాడిగ, 341 హైబ్రీడ్ రకాలకు ఎక్కువ డిమాండ్ ఉంది. ఎకరం మిరప సాగుకు 100 నుంచి 130 గ్రాముల మేర విత్తనం అవసరమైతే.... గతంలో రూ.5 వేల లోపే ఖర్చయ్యేది. ఈసారి రెండు నుంచి మూడు రెట్లు పెరిగిందని రైతులు చెబుతున్నారు. రాష్ట్రంలో విత్తనాల కొరత లేదని వ్యవసాయశాఖ అధికారులు అంటున్నారు. కొన్ని రకాల విత్తనాల కోసం రైతులు పోటీ పడుతుండటం వల్లే వ్యాపారులు ధరలు పెంచేస్తున్నారని... అలాంటి వారిపై చర్యలు తప్పవని హెచ్చరిస్తున్నారు. కొన్ని రకాల విత్తనాల కోసం ఎగబడకుండా రైతులు సంయమనం పాటించాలని నిపుణులు సూచిస్తున్నారు.
ఇదీ చదవండి:
సంగం నిర్వీర్యానికే అమూల్.. కోర్టు చెప్పినా మారని ప్రభుత్వ తీరు: శివరామయ్య
