కోటప్పకొండకు ప్రజలు తరలి వెళ్లే సమయంలో అపశృతి నెలకొంది. గుంటూరు జిల్లా నాదెండ్ల మండలం అమీన్ సాహెబ్ పాలెం గ్రామానికి చెందిన ప్రభ... గురువారం మధ్యాహ్నం గ్రామం నుంచి భక్తజన సందోహం మధ్య కోటప్పకొండకు బయలుదేరింది. ప్రభ అర్ధరాత్రి 12:30 గంటల సమయంలో చిలకలూరిపేట మండలం కమ్మవారిపాలెం- కట్టుబడి వారి పాలెం మధ్య ప్రమాదవశాత్తు పడిపోయింది. ట్రాక్టర్కు సైడు ఇవ్వబోయి ప్రభ చక్రం గుంతలో పడింది. ఒక్కసారిగా ప్రభ ఒరిగిపోయి పక్కనే ఉన్న పొలంలో పడిపోయింది. ఈ ప్రమాదంలో తాడును పట్టుకుని ఉన్న ఇద్దరు కూలీలకు తీవ్ర గాయాలయ్యాయి. వారికి అంబులెన్స్ సిబ్బంది ప్రాథమిక చికిత్స అందించి చిలకలూరిపేట ప్రభుత్వ ఆసుపత్రికి తరలించారు.
కోటప్పకొండకు వెళ్తున్న ప్రభ పడి ఇద్దరు కూలీలకు గాయాలు
