గుంటూరు మిర్చియార్డును ఈనెల 14వ తేదీన తెరిచేందుకు అధికారులు ఏర్పాట్లు చేస్తున్నారు. కరోనా ఉద్ధృతితో పాటు వేసవి సెలవుల దృష్ట్యా మిర్చియార్డును మే 3వ తేదీన మూసివేశారు. రైతులకు ఇబ్బంది లేకుండా ఉండేందుకు గోదాముల వద్ద మిర్చి విక్రయించుకునేందుకు అనుమతించారు. తిరిగి జూన్ 6వ తేదీన యార్డు తెరవాల్సి ఉన్నా కరోనా కర్ఫ్యూ కారణంగా వాయిదా వేశారు.
యార్డులో పనిచేసే హమాలీలు, వ్యాపారులు, కమిషన్ ఏజెంట్లతో చర్చించిన తర్వాత 14వ తేదీన మార్కెట్ తెరవాలని నిర్ణయించారు. దీని కోసం మార్కెట్ యార్డును సిద్ధం చేస్తున్నారు. యార్డులో పేరుకుపోయిన చెత్త చెదారం తొలగిస్తున్నారు. మార్కెట్ను పరిశుభ్రంగా ఉంచటంతో పాటు కరోనా నియంత్రణ చర్యలు చేపట్టినట్లు కార్యదర్శి వెంకటేశ్వరరెడ్డి తెలిపారు. ప్రస్తుతం మిర్చి ధరలు నిలకడగానే ఉన్నాయన్నా ఆయన.. మార్కెట్ యార్డుకు సెస్ రూపంలో ఈ ఏడాది ఇప్పటికే 20కోట్ల మేర ఆదాయం వచ్చిందని తెలిపారు.
