కరోనా నివారణకు పారిశుద్ధ్య కార్మికులు నిరంతరం చిత్తశుద్ధితో పనిచేస్తున్నారని తెదేపా జాతీయ ప్రధాన కార్యదర్శి నారా లోకేశ్ అన్నారు. సీఆర్డీఏ పరిధిలోని పారిశుద్ధ్య కార్మికులకు.. ప్రభుత్వం తక్షణమే వేతనాలు చెల్లించాలని ఆయన డిమాండ్ చేశారు. ఈ మేరకు మంత్రి బొత్స సత్యనారాయణకు లోకేశ్ లేఖ రాశారు. వారికి పీపీఈ కిట్లు అందించడంలో రాష్ట్రప్రభుత్వం విఫలమైందని దుయ్యబట్టారు. చాలాసార్లు పారిశుద్ధ్య కార్మికుల సాధారణ పని గంటలు పొడిగిస్తున్నారని వాపోయారు. సీఆర్డీఏ గ్రామాల్లోని పారిశుద్ధ్య సిబ్బందికి గత 5 నెలలుగా జీతాలు ఇవ్వకపోవటం ఆవేదన కలిగించే అంశమని లేఖలో పేర్కొన్నారు. దీనిపై ప్రభుత్వానికి కార్మికులు పలుమార్లు విన్నవించినా.. పట్టించుకోలేదని మండిపడ్డారు.
సంక్షోభ సమయంలోనూ సమ్మెలో కూర్చోవడం వారికి చివరి అస్త్రంగా మారిందని లోకేశ్ ఆవేదన వ్యక్తంచేశారు. పెనుమక గ్రామంలో పారిశుద్ధ్య కార్మికుల నిరసనను ఈ లేఖకు జత చేస్తున్నట్లు లోకేష్ తెలిపారు. తక్షణమే వారికి జీతాలు చెల్లించేలా చూడటం ప్రభుత్వ కర్తవ్యమని గుర్తుచేశారు. సీఆర్డీఏ ప్రాంతంలోని పారిశుద్ధ్య కార్మికుల బకాయిలన్నీ వెంటనే చెల్లించాలని ప్రభుత్వాన్ని కోరారు.
ఇవీ చదవండి:
