Guntur Body Builder Ravikumar: కష్టాలకు ఎదురొడ్డి.. అంతర్జాతీయ స్థాయిలో పతకాలు సాధిస్తున్న బాడీ బిల్డర్ రవికుమార్

Guntur Body Builder Ravikumar: పేరు, ప్రఖ్యాతుల కోసం పది మంది నడిచే బాటలో సాగేందుకు ససేమిరా అంటోంది.. నేటి యువతరం. ఎటువంటి అవరోధాలు ఎదురైనా, ఎంతటి కష్టం వచ్చినా.. పట్టుదల, ప్రతిభే పెట్టుబడిగా నచ్చిన రంగంలో దూసుకుపోతోంది. ఆ యువకుడు సైతం ఇదే పంథాలో సాగిపోతున్నాడు. దేహదారుఢ్య పోటీల్లో పాల్గొనేందుకు పేదరికం అడ్డొచ్చినా.. ఆత్మవిశ్వాసమే ఆయుధంగా పతకాల పంట పండిస్తున్నాడు. మరి, ఆ కండల వీరుడు ఎవరో చూసేద్దామా.

Guntur Body Builder Ravikumar: పేదరికం.. అవకాశాల్ని, అనుకున్న లక్ష్యాల్ని దూరం చేస్తుందనే ఆలోచన.. ముమ్మాటికి తప్పు అని నిరూపిస్తున్నాడు ఈ కండల వీరుడు. దేహదారుఢ్య పోటీల్లో అంతర్జాతీయ వేదికలపై సత్తా చాటుతున్నాడు. పేద కుటుంబం నుంచి వచ్చిన ఈ యువకుడు బాడీ బిల్డర్‌గా దేశ పేరు ప్రతిష్ఠలు మరింత వ్యాప్తి చేయడమే తన లక్ష్యం అంటున్నాడు. అందుకోసం ఎంతైనా కష్టపడతానంటున్నాడు.

ఈ బాడీ బిల్డర్‌ పేరు నిశ్శంకరరావు రవికుమార్‌. గుంటూరు శివారు గ్రామమైన ఏటుకూరు ఇతని స్వస్థలం. తండ్రి లారీ డ్రైవర్, తల్లి గృహిణి. గత ఎనిమిదేళ్లుగా బాడీ బిల్డింగ్‌పై ఆసక్తితో ముందుకు సాగుతున్నాడు. పేదరికంలో ఉన్నా కూడా కష్టపడి ఈ స్థాయికి వచ్చానని చెబుతున్నాడు రవికుమార్.

పేదరికం నిత్యం ఎగతాళి చేస్తున్నా ఏమాత్రం వెరవకుండా ముందుకు సాగుతున్నాడు రవి కుమార్‌. సెప్టెంబర్‌ 13 నుంచి 15 వరకు ఫిలిప్పీన్స్‌లోని సెబూలో జరిగిన ఏషియన్‌ బాడీ బిల్డింగ్‌ పోటీల్లో 70–75 కేజీల విభాగంలో రవి రజత పతకం సాధించాడు. ఈ విజయంతో నవంబర్‌లో జర్మనీలో జరగనున్న ప్రపంచ బాడీ బిల్డింగ్‌ పోటీలకు దేశం తరపున ఎంపికయ్యాడు. ఇప్పటి వరకు రావడానికి తన ప్రయాణం చాలా కష్టతరంగా సాగింది అంటున్నాడు రవి.

దివంగత మంత్రి మేకపాటి గౌతమ్‌ రెడ్డితో పాటు మరికొంత మంది వల్లే ఈ స్థాయిలో ఉన్నానని చెబుతున్నాడు రవికుమార్. ఇండియన్‌ ఆర్మీలో పని చేసే తనను ఇక్కడికి తీసుకువచ్చి గౌతమ్‌ రెడ్డి ధైర్యాన్నిఇచ్చాడని చెబుతున్నాడు. ప్రభుత్వం కూడా సహకరిస్తామని అన్నట్టు చెబుతున్నాడు.