గుంటూరు కొల్లిశారద మార్కెట్ లో విభేదాలు తలెత్తాయి. కరోనా వ్యాప్తి, తగ్గిన వ్యాపారం దృష్ట్యా ఈ మార్కెట్ను ఏటుకూరు బుడంపాడు బైపాస్ వద్దకు మార్చాలని మార్కెట్ కమిటీ అధ్యక్షుడు నిర్ణయించారు. అందుకు వ్యాపారస్తులు, కమిటీ సభ్యులు నిరాకరించారు. కరోనా మహమ్మారి కారణంగా గుంటూరు ఆర్టీసీ బస్ స్టాండ్ వద్ద ఉన్న ఈ మార్కెట్ను గతంలోనే.. ఏటుకూరు బుడంపాడు బైపాస్ వద్దకు మార్చారు. కరోనా కేసులు తగ్గిన తర్వాత తిరిగి ఆర్టీసీ బస్సు స్టాండ్ ఎదుట కొనసాగిస్తున్నారు.
ఇప్పుడు మళ్లీ.. స్టాక్ దిగుమతికి సౌకర్యంగా లేదని, ఎగుమతిదారులు రావడం లేదని మున్సిపల్ కమిషనర్కు సమాచారం అందింది. సరుకు అంతా మిగిలిపోయి వ్యాపారం దెబ్బతింటోందని ఫిర్యాదులు అందాయి. అలాగే.. కరోనా మూడో వేవ్ వస్తుందన్న ఊహాగానాలపైనా ఆందోళన నెలకొంది. ఈ నేపథ్యంలో మున్సిపల్ కమిషనర్ స్పందించి.. మార్కెట్ను మరోసారి బుడంపాడు బైపాస్ వద్దకు మార్చాలని మార్కెట్ కమిటీ అధ్యక్షుడు సత్యనారాయణను కోరారు.
విషయం తెలిసిన కమిటీ సభ్యులు.. ప్రతిపాదనను వ్యతిరేకించారు. తరలించడానికి వీలు లేదంటూ ఆందోళనకు దిగారు. మార్కెట్ కమిటీ అధ్యక్షుడు తన సొంత ప్రయోజనాల కోసం మార్కెట్ను తరలించాలని చూస్తున్నారని ఆరోపించారు. ఆర్టీసీ బస్ స్టాండ్ వద్దే మార్కెట్ను కొనసాగించాలని డిమాండ్ చేశారు.
ఇదీ చదవండి:
FIRE ACCIDENT: మంచాలు తయారు చేసే కార్ఖానాలో అగ్ని ప్రమాదం.. రూ. 7 లక్షల నష్టం
