శుక్రవారం పోలింగ్ ఉంటే.. జగన్ ఓటు వేయలేరు!

జగన్ అసెంబ్లీకి రారు కానీ ప్రతి శుక్రవారం కోర్టుకు మాత్రం వెళ్తారు. పోలింగ్ శుక్రవారం రోజున పెడితే జగన్ ఓటు కూడా వేయలేరు: గుంటూరు రోడ్​షోలో చంద్రబాబు

ప్రతిపక్ష నాయకుడు జగన్ మెహన్ రెడ్డికి ఓటేస్తే మోదీకి వేనట్లేనని ముఖ్యమంత్రి చంద్రబాబు విమర్శించారు. గుంటూరులో నిర్వహించిన రోడ్​షోలో జగన్, కేసీఆర్​లపై... సీఎం వాగ్బాణాలను సంధించారు. 'తెలంగాణ నుంచి ఆంధ్రాకి 5 వేల కోట్ల రూపాయల విద్యుత్ బకాయిలు రావాలి. ఇవి అడిగితే మనమే 2 వేల కోట్లు ఇవ్వాలని అంటున్నారు. దీనిపై అవసరమైతే కోర్టుకు వెళ్తామే తప్పా వదిలే ప్రసక్తి లేదు. సేవామిత్ర యాప్​ డేటా దొంగిలించి వైకాపాకు కేసీఆర్ అప్పగించారు. మా ప్రభుత్వ డేటా మేము కాపాడుకుంటాము తప్పా.. నీ పెత్తనం నాపైనా అవసరం లేదు' అని తీవ్ర స్థాయిలో ధ్వజమెత్తారు. రాష్ట్రంలో 9 లక్షల ఓట్లు తొలగించేందుకు కేసీఆర్ పన్నిన కుట్రను అడ్డుకున్నామని చెప్పారు.

జగన్ మామూలు వ్యక్తి కాదని... అరాచక శక్తి అని సీఎం అన్నారు. రాష్ట్ర ప్రతిపక్ష నేత అంత కరుడుగట్టిన మరో అవినీతిపరుడెవరూ.. ఎన్నికల్లో పోటీలో లేరని చంద్రబాబు ఆరోపించారు. ప్రతి శుక్రవారం కోర్టుకు వెళ్తారేగానీ అసెంబ్లీకి రారని ఎద్దేవా చేశారు. పోలింగ్​ శుక్రవారం రోజున పెడితే జగన్ ఓటు వేయలేరని అన్నారు. కేసీఆర్ రిటర్న్​ గిఫ్ట్ తనకు ఇవ్వకుండా.. నగదు రూపంలో జగన్​కి ఇచ్చారని విమర్శించారు. ఇప్పటికే వెయ్యి కోట్లు వైకాపాకు అందాయని ఆరోపించారు.