Rising Debt in the State: రాష్ట్రంలో అప్పులు..లెక్కకు మిక్కిలిగా పెరిగిపోతున్నాయి. అదే సమయంలో ఆస్తుల సృష్టికి ఉపయోగపడే మూలధన వ్యయం కుంటుపడింది. 2022-23 ఆర్థిక సంవత్సరంలో.. తొలి 8 నెలల లెక్కలను పరిశీలిస్తే 6వేల188 కోట్ల రూపాయలు మాత్రమే.. ఆస్తులు సృష్టించేందుకు ప్రభుత్వం వ్యయం చేసింది.
ఈ ఏడాది.. 30వేల 679 కోట్ల రూపాయలు మూలధన వ్యయం కింద ఖర్చు చేస్తామని ప్రభుత్వం బడ్జెట్ ప్రతిపాదనల్లో తెలిపింది. అయితే.. అంచనాల్లో 20శాతం మాత్రమే వినియోగించినట్లు తెలుస్తోంది. అదే సమయంలో అప్పులు మాత్రం ఏకంగా అంచనాలకు మించి 11 శాతం అధికంగా తీసుకువచ్చింది. ఈ అప్పుల లెక్కల్లో కార్పొరేషన్ల రుణాల లెక్కల్ని బయటకు వెల్లడించడం లేదు. వాటిని కూడా కలిపితే రుణం అంచనాలకు మించి ఎన్నో రెట్లు పెరిగిపోతుంది.
సాగునీటి ప్రాజెక్టులు, రహదారులు, పోర్టులు, ఇతరత్రా ఆస్తులు సృష్టికి వెచ్చించే మొత్తాన్ని మూలధన వ్యయంగా పేర్కొంటారు. ఈ ఖర్చు వల్ల ఏర్పరచుకునే ఆస్తి నుంచి మళ్లీ ప్రభుత్వానికి ఆదాయం వస్తుంది. రాష్ట్ర ప్రభుత్వం ఏటా దీనికి చాలా తక్కువే కేటాయిస్తూ వస్తోంది. మూలధన వ్యయం బాగా తగ్గిందని కాగ్ లెక్కలు కూడా చెబుతున్నాయి. ఈ ఆర్థిక సంవత్సరంలో నవంబరు నెలాఖరు వరకు చేసిన ఖర్చుల వివరాలను కాగ్ వెల్లడించింది. వాటి ఆధారంగా చూస్తే మూలధన వ్యయం మరీ తక్కువగా ఉంది. 8 నెలల్లో కేవలం అంచనాల్లో 20శాతానికే పరిమితమైంది.
ఇవీ చదవండి:
