Miscreants set fire to endowment office: ఆలయానికి సంబంధించిన సుమారు 3,600 ఎకరాల భూమి పత్రాలు కాల్చిన ఘటనలో పోలీసులు దర్యాప్తు ముమ్మరం చేశారు. భూమి పత్రాలను కాల్చే ఉద్దేశంతోనా.. లేదా టెండర్ల రికార్డులను కాల్చడం కోసం కార్యాలయానికి నిప్పంటించారా! అన్న కోణంలో విచారణ చేపట్టారు.
ఏలూరు జిల్లా నూజివీడు మండలం గొల్లపల్లి గ్రామంలోని శ్రీ రఘునాథ స్వామి ఆలయ కార్యనిర్వహరణ అధికారి (ఈఓ) కార్యాలయానికి గుర్తు తెలియని వ్యక్తులు నిప్పు పెట్టారు. మంటల్లో 3,600ఎకరాల భూముల కౌలుదారుల వివరాలతో కూడిన రికార్డులు, పలు ఆలయ రికార్డులు అగ్నికి ఆహుతైనట్లు అధికారులు తెలిపారు. అగ్నిప్రమాద ఘటనపై ఈఓ విశ్వేశ్వరరావు పోలీసులకు ఫిర్యాదు చేసినట్లు వెల్లడించారు. ఘటనా స్థలానికి చేరుకున్న రూరల్ పోలీసులు సీసీ ఫుటేజ్ పరిశీలించారు. పలువురిని ప్రశ్నించారు. 1983 వ సంవత్సరం నుంచి రఘునాథ స్వామి ఆలయానికి చెందిన ఎండోమెంట్ భూములపై రైతులకు, అధికారులకు మధ్య వాగ్వాదాలు కొనసాగాయి. ఈ నేపథ్యంలో అప్పటి ప్రభుత్వం స్పందించి డాక్టర్ చల్లా కొండయ్య కమిషన్ ఏర్పాటు చేసింది. ఈ కమిషన్ ఛైర్మన్ డాక్టర్ చల్లా కొండయ్య అప్పట్లో భూ వివాదాల పరిష్కారానికి కృషి చేశారు. కమిషన్ తీరు నచ్చని కొందరు రైతులు అప్పట్లో సుప్రీంకోర్టును ఆశ్రయించారు. ఇరుపక్షాల వాదనలు విన్న సుప్రీం కోర్టు 1996 వ సంవత్సరంలో వెల్లడించిన తీర్పు మేరకు.. సాగులోని చిన్న, సన్నకారు రైతాంగం ఎకరాకు ఒక క్వింటా వేరుశెనగ కాయలు లేదా.. అందుకు సమానమైన ధర ఆలయానికి చెల్లించాల్సి ఉంటుంది.
'గొల్లపల్లి గ్రామంలోని శ్రీ రఘునాథ స్వామి ఆలయానికి చెందిన ఆఫీస్ ఈఓ ఆఫీస్లోకి దూరి బీరువాను తీసి అందులో ఉన్న విలువైన పత్రాలను కాల్చారు. ఇది భూములకు సంబందించిన వ్యవహారమా లేక.. కాంట్రాక్ట్ టెండర్లకు సంబంధించిన అంశమా అనేది తెలియాల్సి ఉంది. ఘటనపై కేసు నమోదు చేసిన విచారణ చేపట్టాం. ఆఫీస్లో ఉన్న సీసీటీవీలో నమోదైన దృశ్యాల ఆధారంగా నిందితులను త్వరలోనే పట్టుకుంటాం.'- పోలీస్ అధికారి
ఈ నేపథ్యంలో ఎండోమెంట్ కార్యాలయంలోని భూ రికార్డుల దగ్ధంపై పలు అనుమానాలు వ్యక్తం అవుతున్నాయి. రికార్డులను అగ్నికి ఆహుతి చేయడంతో భూ వివాదాలు మళ్లీ తెరపైకి వచ్చే అవకాశాలు కనిపిస్తున్నాయని అధికారులు వెల్లడించారు. కౌలుకు సంబందించిన పత్రాలు పూర్తిగా దగ్ధమైనట్లు ఆలయ అధికారులు పేర్కొన్నారు. నిందితులను వెంటనే పట్టుకోవాలని గ్రామస్థులు కోరుతున్నారు. ఈ ఘటనలో పెద్దల హస్తం ఉన్నట్లు అనుమానాలు వ్యక్తం చేస్తున్నారు. భూముల కోసం దుశ్చర్యలకు పాల్పడ్డారా.. లేక టెండర్లకు సంబందించిన అంశంపై ఈ దారుణానికి ఒడిగట్టారా అనేది తైల్చాలని గ్రామస్థులు డిమాండ్ చేస్తున్నారు.
ఇవీ చదవండి:
