జనసేన హామీలు.. అన్ని వర్గాలకూ వరాలు

రాజమహేంద్రవరంలో జనసేన ఆవిర్భావ సభ జరిగింది. పార్టీ అధ్యక్షుడు పవన్ కల్యాణ్ ప్రజలకు అనేక హామీలు ఇస్తూ... మేనిఫెస్టోను ప్రకటించారు.

జనసేన పార్టీ అధికారంలోకి వస్తే రైతుకు ఎకరానికి 8 వేల సాయం చేస్తామన్నారు అధ్యక్షుడు పవన్ కళ్యాణ్. రాజమహేంద్రవరం వేదికగా నిర్వహించిన జనసేనఆవిర్భావ సభలో.. ఆయన మేనిఫెస్టో విడుదల చేశారు.60 ఏళ్లుపై బడిన సన్న , చిన్న కారు రైతులకు 5 వేల పింఛను ఇస్తామన్నారు.

అభివృద్ధి కోసం భూమిలిచ్చిన రైతులకు 2013 భూసేకరణ చట్టం ప్రకారం పరిహారం చెల్లిస్తామని హామీ ఇచ్చారు. రైతులకు ఉచితంగా సోలార్ మోటర్లు ఇప్పిస్తామని తెలిపారు.నదుల అనుసంధానం చేసి కొత్త జలశయాలు నిర్మిస్తామన్నారు.

కేజీ నుంచి పీజీ దాకా అందరికీ ఉచిత విద్యను అందిస్తామని... విద్యార్థులకు గుర్తింపు కార్డుపై ఉచిత ప్రయాణ సదుపాయాన్ని కల్పిస్తామని హామీ ఇచ్చారు.ఆరేళ్లలో లక్ష ఉద్యోగాలు, ఐదేళ్లలో 10 లక్షల ఉద్యోగాల కల్పనే జనసేన లక్ష్యమని తెలిపారు. డొక్కా సీతమ్మ పేరుతోక్యాంటీన్లు ఏర్పాటు చేసి ఉచితంగా భోజనం అందిస్తామని చెప్పారు.

ప్రభుత్వ ఉద్యోగాల పరీక్షలకు ఏడాదికి ఒకసారే ఫీజు చెల్లించే విధంగా మార్పు తీసుకొస్తామని తెలిపారు.ఎవరూ లంచం అడగని అవినీతి రహిత వ్యవస్థను నిర్మించటం.. ప్రభుత్వ ఉద్యోగుల కోసం సీపీఎస్ విధానాన్ని రద్దు చేయడం తమ లక్ష్యంగా పవన్ చెప్పారు.బీసీలకు 5 రాజకీయ రిజర్వేషన్లు కల్పిస్తామని స్పష్టం చేశారు.