తూర్పు గోదావరి జిల్లా సముద్ర తీరం అంతర్వేది పల్లిపాలెం వద్ద తెదేపా ప్రభుత్వ హయాం 2015లో ఫిషింగ్ హార్బర్ మంజూరైంది. రూ.30 కోట్ల రూపాయల నిధులతో నిర్మిస్తున్నారు. ఏడాది క్రితం వరకు 80 శాతంపైగా పనులు పూర్తయ్యాయి. మొత్తం మీద ఇప్పటి వరకు 90 శాతం మేర నిర్మాణం పూర్తి చేసుకున్నట్లు రాజోలు హెడ్ వర్క్స్ డీఈఈ శ్రీనివాస్ తెలిపారు. వచ్చే మార్చి 31 నాటికి నూరు శాతం పనులు పూర్తవుతాయన్నారు.
స్థానిక ఇంజినీర్లకు సూచనలు..
ఇటీవలే బెంగళూరుకు చెందిన సెంట్రల్ యూనిట్ కోస్టల్ ఇంజనీరింగ్ ఆఫ్ ఫిషరీస్ శాఖకు చెందిన ఇంజనీరింగ్ బృందం ఈ హార్బర్ను పరిశీలించింది. పనుల విషయంలో అదనపు వసతులు తెలియజేస్తూ స్థానిక ఇంజనీరింగ్ అధికారులకు సూచనలు అందించారు.
మరపడవల్లో వచ్చి..
అంతర్వేది సముద్రతీరంలో అపారమైన మత్స్య సంపద ఉంది. ఇక్కడకు కృష్ణా, విశాఖ, సబా ఉభయ గోదావరి జిల్లాలకు చెందిన గంగపుత్రులు మర పడవల్లో వచ్చి ఇక్కడే రోజుల తరబడి ఉంటూ మత్స్య సంపదని వేటాడతారు. అలాంటి వారికి అనువైన ఫిషింగ్ హార్బర్ ఇంతవరకు ఎక్కడా లేదు.
సకల సదుపాయాలతో..
ప్రస్తుతం రూ. 30 కోట్ల నిధులతో చేపడుతున్న ఫిషింగ్ హార్బర్ ద్వారా సకల సదుపాయాలు అందుబాటులోకి రానున్నాయి. యాక్షన్ హాల్ పరిపాలనా భవనం, క్యాంటీన్ వర్క్ షాప్, గేర్ షెడ్ సెక్యూరిటీ భవనం, టాయిలెట్ బ్లాక్, ఇంటర్నల్ రహదారులు పక్క డ్రైన్లు పనులు పూర్తైనట్లు డీఈఈ శ్రీనివాస్ వెల్లడించారు. యాక్షన్ హాల్లో టైల్స్ అమర్చడం తదితర పనులు కూడా వేగంగా పూర్తి చేస్తామన్నారు.
ఒకేసారి 100 మంది..
మత్స్యకారులు సముద్రంలో వేటాడిన మత్స్య సంపదను ఫిషింగ్ హార్బర్ వద్దకు తీసుకొచ్చి విక్రయించుకునే విధంగా ఇక్కడ వసతులు అందుబాటులోకి రానున్నాయి. ఫిషింగ్ హార్బర్లో ఒకేసారి 100 మర పడవలపైగా ఉండేందుకు అనువుగా నిర్మించడం విశేషం.
