అమాయక ప్రజలే లక్ష్యం... మధ్యప్రదేశ్, జార్ఖండ్, పంజాబ్ కేంద్రంగా మోసాలు

అమాయక ప్రజలే లక్ష్యంగా సైబర్ మోసాలకు పాల్పడుతున్న చిత్తూరుకు చెందిన ఇద్దరిని మధ్యప్రదేశ్ పోలీసులు అరెస్టు చేశారు. మధ్యప్రదేశ్​లో నమోదైన ఫిర్యాదు ఆధారంగా దర్యాప్తు చేసిన పోలీసులు... ఏడాది కాలంలో నిందితులు చేసిన మోసాల వివరాలను సేకరించి, ఆధారాలు రాబట్టారు.

మధ్యప్రదేశ్, జార్ఖండ్, పంజాబ్ రాష్ట్రాలకు చెందిన కొందరు గుర్తుతెలియని వ్యక్తులు... కొంతకాలంగా ఆన్​లైన్​లో మోసాలకు పాల్పడుతున్నారు. ఫేస్ బుక్, ఇన్‌స్టాగ్రామ్ వంటి సామాజిక మాధ్యమాల ద్వారా కమీషన్లు ఇస్తామని చెప్పి... ఓటీపీ, ఏటీఎం నంబర్ వివరాలు సేకరించి ఖాతాల్లోని నగదును కాజేస్తున్నారు. ఆ నగదుతో ప్రముఖ ఆన్​లైన్ షాపింగ్ సైట్లలో ఖరీదైన వస్తువులను కొనుగోలు చేసి కమిషన్ పొందుతున్నారు.

దీనికి ఆకర్షితులైన చిత్తూరులోని మిట్టూరుకు చెందిన హరిప్రసాద్, శ్రావణ్... తమకు తెలిసిన వారి క్రెడిట్ కార్డుల ద్వారా వస్తువులు కొనుగోలు చేసి, అధిక మొత్తంలో కమిషన్ అర్జిస్తున్నారు. ఈ ఘటనపై మధ్యప్రదేశ్ రాష్ట్రంలో నమోదైన కేసుపై పోలీసులు దర్యాప్తు చేపట్టగా... ప్రజలు మోసపోతున్న నగదు హరిప్రసాద్, శ్రావణ్ లకు వెళ్తున్నట్లు గుర్తించారు.

చిత్తూరుకు చేరుకున్న ఎంపీ పోలీసులు, స్థానిక క్రైం పోలీసుల సహకారంతో మిట్టూరులోని రాగిమానువీధిలో హరిప్రసాద్, శ్రావణ్​ను అరెస్టు చేశారు. ఏడాది కాలంలో వారు రూ.28 లక్షలు వ్యాపారం చేసినట్లు గుర్తించి, వారి నుంచి పలు ఆధారాలను సేకరించారు. ఇద్దరినీ మధ్యప్రదేశ్ కు తీసుకెళ్లి, అక్కడి న్యాయస్థానం ఎదుట హాజరుపరచనున్నట్లు పోలీసులు వెల్లడించారు.

ఇదీ చదవండి: