చిత్తూరు జిల్లాకు పొరుగునే ఉన్న శ్రీ పెరంబదూరు, చెన్నై, బెంగళూరు, దాదాపు 800 కిలోమీటర్లకు పైగా దూరంలో ఉన్న విశాఖ నుంచి ఆక్సిజన్‌ సరఫరా అవుతోంది. తరచూ ప్రాణవాయువు ట్యాంకర్లు తిరుపతి, చిత్తూరులోని ఆక్సిజన్‌ ప్లాంట్లను నింపుతుండటంతో ఇప్పటివరకూ పెద్దగా సమస్యలు ఎదురు కాలేదు. ఈ నేపథ్యంలో గాలిలో సేకరించిన ఆక్సిజన్‌ను ద్రవరూపంలోకి మార్చి బాధితులకు అందించే వ్యవస్థ (పీఎస్‌ఏ)ను ఏర్పాటు చేయడానికి రంగం సిద్ధం చేశారు.
ఇప్పటికే తిరుపతి రుయాలో ప్రెజర్‌స్వింగ్‌ అడాప్షన్‌ (పీఎస్‌ఏ) కేంద్రం ఏర్పాటుకు గతంలోనే అనుమతి ఇచ్చారు. తాజాగా మరో అయిదు కేంద్రాల ఏర్పాటుకు ప్రభుత్వం పచ్చజెండా ఊపింది. ఫలితంగా ఆక్సిజన్‌ ట్యాంకర్లపై ఆధారపడటం కొంతమేర తగ్గే అవకాశం ఉంది. వీటన్నింటినీ మూడు నెలల్లో పూర్తి చేయాలని అధికార యంత్రాంగం లక్ష్యంగా పెట్టుకుంది.
తిరుపతిలోనే రెండు పీఎస్‌ఏలు
ఇప్పటికే తిరుపతి రుయాలో ఓ ఆక్సిజన్‌ ఉత్పత్తి కేంద్రం ఏర్పాటుకు అనుమతి ఇవ్వగా.. తాజాగా మరో రెండింటిని ఏర్పాటు చేయాలని నిర్ణయించారు. తిరుపతిలోని బర్డ్‌, ఈఎస్‌ఐ ఆసుపత్రితోపాటు మదనపల్లె జిల్లా ఆసుపత్రి, పలమనేరు, నగరి ప్రాంతీయ వైద్యశాలల్లో కూడా వీటిని ఏర్పాటు చేయనున్నారు. ప్రస్తుతం మదనపల్లె జిల్లా ఆసుపత్రిలో కొవిడ్ బాధితులకు ఆక్సిజన్‌ సిలిండర్ల ద్వారా ప్రాణవాయువు అందిస్తున్నారు.
గతేడాదే ఇక్కడ ఆక్సిజన్‌ ట్యాంకరు ఏర్పాటు చేయాలని నిర్ణయించినప్పటికీ.. పురోగతి లేదు. ప్రస్తుతం 3 కేఎల్‌ ట్యాంకరుకు అధికారులు ప్రతిపాదనలు పంపారు. దీని నిర్మాణంతోపాటు కొత్తగా పీఎస్‌ఏ ఏర్పాటు చేస్తే పడమటి మండలాల ప్రజలకు మరింత ప్రయోజనం ఉంటుంది. ఇందుకు అవసరమైన స్థలాన్ని చూపాలని ఉన్నతాధికారులు ఇప్పటికే జిల్లా ఆసుపత్రి వర్గాలను కోరారు.
ప్రతిపాదిత పీఎస్‌ఏ సామర్థ్యం 500 ఎల్‌పీఎమ్‌ (నిమిషానికి 500 లీటర్ల ఆక్సిజన్‌ ఉత్పత్తి)గా ఉండనుంది. తద్వారా ఒకేసారి సుమారు 90 మంది కరోనా బాధితులకు ప్రాణవాయువు అందించవచ్చని జిల్లా వైద్య, ఆరోగ్యశాఖ అధికారులు పేర్కొంటున్నారు. మిగతా నాలుగు ఆసుపత్రుల్లో ప్రతిపాదిత ఆక్సిజన్‌ ఉత్పత్తి కేంద్రాల సామర్థ్యం 200 ఎల్‌పీఎమ్‌ నుంచి 1,000 ఎల్‌పీఎమ్‌ వరకు ఉండవచ్చని అధికారులు భావిస్తున్నారు.
డీఆర్‌డీవో ఆధ్వర్యంలో..
పీఎస్‌ఏ ఏర్పాటుకు సంబంధించిన యంత్ర సామగ్రిని రక్షణ పరిశోధనాభివృద్ధి సంస్థ (డీఆర్‌డీవో) అందజేయనుంది. వైద్య, ఆరోగ్యశాఖ, పీఎం కేర్‌ ఫండ్స్‌తో వీటిని నెలకొల్పనున్నారు. కాగా పీఎస్‌ఏ ప్లాంట్లకు అవసరమైన నిర్మాణ, విద్యుత్తు వ్యవస్థను ఏర్పాటు చేసే బాధ్యతను జాతీయ రహదారుల సంస్థ (ఎన్‌హెచ్‌ఏఐ)కు అప్పగించారు. ప్రస్తుతం వీరికి ఒక్క మదనపల్లెకు సంబంధించిన పనులు చేపట్టేలా చూడాలని మాత్రమే ఉత్తర్వులు వచ్చాయి. సోమవారం నగరి ప్రాంతీయ వైద్యశాలలోని స్థలాన్ని ఎన్‌హెచ్‌ఏఐ అధికారులు పరిశీలించారు.
ఆక్సిజన్‌ సమస్యలు తగ్గుతాయి
జిల్లాలో అయిదు ఆక్సిజన్‌ ఉత్పత్తి కేంద్రాలకు ప్రభుత్వం నుంచి అనుమతులు వచ్చాయి. సివిల్‌, విద్యుత్తు పనులను ఎన్‌హెచ్‌ఏఐ చేపట్టనుంది. వారు స్థలాలు కూడా పరిశీలిస్తున్నారు. మదనపల్లె పీఎస్‌ఏ ముందుగా అందుబాటులోకి వచ్చే అవకాశం ఉంది. మిగతా నాలుగు కూడా మూడు నెలల్లోపు ఏర్పాటు చేయాలని భావిస్తున్నాం. తద్వారా ఆసుపత్రుల్లో ఆక్సిజన్‌ సమస్యలు తగ్గుతాయి. బాధితులకు మెరుగైన వైద్య సేవలు అందుతాయి. సుదూర ప్రాంతాలకు వెళ్లే భారం కూడా తప్పుతుంది. - ధనుంజయరెడ్డి, ఈఈ, ఏపీఎంఎస్‌ఐడీసీ
ఇదీ చదవండి:
