పోలీసులకు డబ్బు ఇవ్వజూపిన వైకాపా నేతలు..!

2019 ఎన్నికల్లో సహకారం కోసం వైకాపా నాయకులు... పోలీసులకు డబ్బు ఇవ్వజుపినట్లు మైలవరం ఎస్సై తెలిపారు. మైలవరం, జి.కొండూరు, రెడ్డిగూడెం ఠాణాలకు నగదు కవర్లతో వెళ్లినట్లు పేర్కొన్నారు.

కృష్ణా జిల్లా మైలవరం నియోజకవర్గంలో నగదు కవర్లు కలకలం సృష్టించాయి. వచ్చే ఎన్నికల్లో సహకారం కోసం వైకాపా నేతలు పోలీసులకు డబ్బు ఇవ్వజూపారని ఆరోపణలు వస్తున్నాయి. మైలవరం, జి.కొండూరు, రెడ్డిగూడెం ఠాణాలకు వైకాపా నాయకులు కవర్లతో వెళ్లినట్లు మైలవరం ఎస్సై శ్రీనివాస్ తెలిపారు. సీసీ కెమెరా దృశ్యాల ఆధారంగా నగదు తీసుకెళ్లిన వ్యక్తి మాగంటి వెంకటరామారావు.. అలియాస్‌ అబ్బాయిగా గుర్తించారు. మైలవరం వైకాపా అభ్యర్ధి కృష్ణప్రసాద్‌ కవరు పంపారని స్టేషన్‌కు వెళ్లి రామారావు చెప్పినట్లు పోలీసులు వెల్లడించారు. డబ్బును తిరస్కరించిన పోలీసులు ఉన్నతాధికారులకు సమాచారం ఇచ్చామన్నారు. రామారావుపై ఐపీసీలోని 448, 109 ఎన్నికల నేరం, 171 కింద కేసు నమోదు చేసినట్లు తెలిపారు.