రాష్ట్రానికి, ప్రజలకు అల్లా దయ ఎల్లప్పూడూ ఉండాలని ముఖ్యమంత్రి వైఎస్ జగన్మోహన్ రెడ్డి ఆకాంక్షించారు. రంజాన్ పండుగ సందర్భంగా ముస్లిం సోదరులకు జగన్ శుభాకాంక్షలు తెలిపారు. సత్యనిష్ట సత్ప్రవర్తనకు ప్రతీక రంజాన్ అని తన సందేశంలో తెలిపారు. దీక్షలు , ఉపవాసాలు, దైవారాధన, దానధర్మాలు, చెడును త్యజించడం, మానవులకు సేవ వంటి సత్కార్యాల ద్వారా భగవంతున్ని స్మరించడమే రంజాన్ ముఖ్య ఉద్దేశమని వివరించారు. అల్లా కరుణతో ప్రజలు సుఖసంతోషాలతో జీవించాలని తెలిపారు.
దేశం సుభిక్షంగా ఉండాలి: చంద్రబాబు
అల్లా దయతో దేశం, రాష్ట్రం సుభిక్షంగా ఉండాలని తెదేపా జాతీయ అధ్యక్షుడు, మాజీ ముఖ్యమంత్రి చంద్రబాబు నాయుడు ఆకాంక్షించారు. ముస్లిం సోదరులకు ఆయన రంజాన్ శుభాకాంక్షలు తెలిపారు. దాతృత్వం, పరమత సహనం, శాంతియుత జీవనమే మహ్మద్ ప్రవక్త బోధనలని తెలిపారు. ముస్లిం సోదరులు స్నేహానికి మారుపేరని, సమాజంలో స్నేహ, సౌహార్ధ సంబంధాల కోసం అందరూ కృషి చేయాలని కోరారు.
పవన్, రఘువీరా శుభాకాంక్షలు...
ముస్లిం సోదరులకు జనసేన అధినేత, ప్రముఖ సినీనటుడు పవన్ కల్యాణ్, ఏ పీసీసీ అధ్యక్షుడు రఘువీరా రెడ్డి రంజాన్ శుభాకాంక్షలు తెలిపారు. సర్వ మానవాళి స్నేహ సౌభ్రాతృత్వానికి రంజాన్ ప్రతీకని వారు పేర్కొన్నారు.
ఇదీ చదవండీ: విరాళాల వివరాలు వెల్లడించని భాజపా, కాంగ్రెస్
