తెలుగుదేశం పార్టీ ఎంపీలు చట్టబద్ధంగానే భాజపాలో చేరారని కేంద్ర హోంశాఖ సహాయ మంత్రి కిషన్‌రెడ్డి సమర్ధించారు. దిల్లీలో ఆయన మీడియాతో మాట్లాడారు. తెదేపా ఎంపీలు భాజపాలో చేరుతున్నట్లు తీర్మానం చేసి సమాచారం ఇచ్చారన్న కిషన్‌రెడ్డి... తీర్మానం చేశాక అమిత్ షా, రాజ్యసభ ఛైర్మన్‌కు సమాచారం ఇచ్చారని తెలిపారు. ఎంపీల చేరికపై భాజపాలో చర్చించి ఆమోదించారని స్పష్టం చేశారు.
చట్టపరంగా అన్ని నిబంధనలకు అనుగుణంగానే చేరారన్న కిషన్‌రెడ్డి... 10వ షెడ్యూల్ ప్రకారం రాజ్యసభలో 16 సార్లు విలీనాలు జరిగిన విషయం గుర్తుచేశారు. రాజ్యసభ ఛైర్మన్‌ చట్ట ప్రకారమే వ్యవహరించారని చెప్పుకొచ్చారు. భాజపాలో చేరిన ఎంపీలపై కేసులు లేవు, ఛార్జిషీట్‌లు లేవన్న కేంద్రమంత్రి... ఆరోపణలపై చట్టం తనపని తాను చేసుకుపోతుందని స్పష్టం చేశారు. ఆర్థికపరమైన అంశాల్లో వారిపై ఆరోపణలే ఉన్నాయన్నారు.
హోంశాఖలోని అంతర్గత భద్రత శాఖ తనకే అప్పగించారని కిషన్‌రెడ్డి తెలిపారు. జమ్ముకశ్మీర్‌, ఈశాన్య రాష్ట్రాల బాధ్యతలూ ఇచ్చారని చెప్పారు. ఉగ్రవాద నిరోధక చర్యల విభాగాన్ని కూడా తనకే అప్పగించినట్లు వెల్లడించారు. ఆయా ప్రాంతాల్లోని ఉగ్రవాద ముఠాలపై సమీక్ష చేస్తామన్న కిషన్‌రెడ్డి... దేశవ్యాప్తంగా పోలీసుశాఖను ఆధునికీకరించాల్సిన అవసరం ఉందని అభిప్రాయపడ్డారు. పోలీసుశాఖలో సాంకేతిక వినియోగం పెంచుతామన్న మంత్రి... కేంద్రపాలిత ప్రాంతాల్లోని శాంతి భద్రతలపై సమీక్ష చేస్తామని వివరించారు.
ఇదీ చదవండీ... "ప్రభుత్వ, ప్రైవేటు పాఠశాలల్లోనూ అమ్మఒడి"
