ఇష్టం మనది.. కష్టం నాన్నది

ఫాదర్స్​డేరోజు... ప్రేమతో నాన్నకు మనమేం ఇవ్వగలం? అసలు ఇవ్వడానికి మన దగ్గర ఏముంది? పిల్లలే సర్వస్వంగా భావించే నాన్నను ప్రేమతో పలకరించడానికి ఒక్క రోజు చాలుతుందా? చాలదు కదూ!  అందుకే..ఆయన మనకు చేసినవన్నీ ఓసారి గుర్తు చేసుకుందామా?

అమ్మ మనకు ప్రాణం పోస్తే ఆ ప్రాణానికి ఓ రూపమిచ్చి వ్యక్తిగా తీర్చిదిద్దేది నాన్న. ఉద్యోగమని పొద్దున్నే లేచి వెళ్లే నాన్న ఇంటి పట్టున ఉండలేడు.. కడుపునిండా భోజనం చేయడు.. కంటినిండా నిద్ర కూడా పోడు. పిల్లల ఉజ్వల భవిష్యత్తు కోసం.. కుటుంబ సౌఖ్యం కోసం ఇంటా బయటా నిరంతరం పోరాటం చేస్తూ మనకోసం నిరంతరం శ్రమించే వ్యక్తి నాన్న.

ప్రేమకు ప్రతిరూపం..

ప్రతి విజయంలోనూ వెన్నంటే ఉంటూ ఏ కష్టమొచ్చినా నేనున్నానంటూ ఆసరా ఇచ్చే శక్తి నాన్న. తప్పు చేసినా చిరునవ్వుతో మన్నించి సన్మార్గంలో నడిచేందుకు స్ఫూర్తినిచ్చే వ్యక్తి నాన్న ఒక్కడే. నిస్వార్థంగా సేవలందిస్తూ.. పిల్లలకు రెక్కలొచ్చే వరకు బలం అందిస్తున్న తండ్రి... ప్రేమకు ప్రతిరూపం.

భారమెంతున్నా... తోడునిలిచే శక్తి..

పిల్లల కోసం ఎన్ని కష్టాలు పడినా, కుటుంబపోషణ భారమైనా, అది ఎవరికీ చెప్పకుండా అనునిత్యం శ్రమిస్తూ కుటుంబానికి రక్షకుడు అవుతాడు నాన్న. సమాజంలోని మంచి, చెడు, తప్పొప్పులు, విజ్ఞానం, లోకజ్ఞానం అన్నీ విషయాలు వివరించేది ఆయనొక్కరే. జీవితంలో తండ్రి పాత్ర ఎలాంటిదో మనలో ప్రతి ఒక్కరూ ఆలోచించాల్సిన అవసరం ఎంతైనా ఉంది. అది తెలుసుకుని మీ నాన్నలకు ఈ ఫాదర్స్ డే శుభాకాంక్షలు తెలుపండి!

ఇదీ చదవండిః ఇస్మార్ట్​ బ్యూటీ.. అందాల రాశి