'వచ్చిన నెలకే హామీలు నెరవేర్చే దిశగా కృషి చేస్తున్నాం'

జాతీయ రహదారులపై మద్యం దుకాణాలను తొలగించేందుకు ఎక్సైజ్​ శాఖకు ఇప్పటికే పోలీసు శాఖ తరపున కొన్ని సూచనలు చేసినట్లు హోంమంత్రి మేకతోటి సుచరిత తెలిపారు.

అధికారంలోకి వచ్చిన నెలరోజుల్లోనే ఇచ్చిన హామీలను నెరవేర్చే దిశగా వైకాపా ప్రభుత్వం చర్యలు చేపడుతోందని రాష్ట్ర హోంమంత్రి మేకతోటి సుచరిత అన్నారు. మద్యపాన నిషేధాన్ని దశలవారీగా చేపడతామని... ఇప్పటికే జిల్లా కలెక్టర్ల సదస్సులోనూ సీఎం ఈ విషయాన్ని స్పష్టంగా తెలిపారని మంత్రి వెల్లడించారు. జాతీయ రహదారులపై మద్యం దుకాణాలను తొలగించేందుకు ఎక్సైజ్​శాఖకు ఇప్పటికే పోలీసు శాఖ తరపున కొన్ని సూచనలు చేసినట్లు వెల్లడించారు. అక్టోబరు 1 నాటికి బెల్టు దుకాణాలను తొలగించాలని సీఎం స్పష్టం చేశారని.. పోలీసు విభాగం తరపున వీటిపై స్పష్టమైన కార్యాచరణ చేపడతామన్నారు.