ఇంటెలిజెన్స్ డీజీ పదవికి కుమార విశ్వజిత్, రాజేంద్రనాథ్ రెడ్డి, సీఎస్ రామాంజనేయులు పోటీ పడుతున్నారు. అనూహ్యంగా స్టీఫెన్ రవీంద్ర పేరు తెరపైకి రావడం ప్రాధాన్యత సంతరించుకుంది. స్టీఫెన్ ప్రస్తుతం తెలంగాణ కేడర్లో హైదరాబాద్ ఐజీగా విధులు నిర్వహిస్తున్నారు. స్టీఫెన్ కెరీర్లో నక్సలిజం, ఫ్యాక్షనిజం, డ్రగ్ మాఫియాపై సమర్థవంతంగా పని చేశారనే ముద్ర వేసుకున్నారు.
స్టీఫెన్ విద్యాభ్యాసం
స్టీఫెన్ విద్యాభ్యాసం హైదరాబాద్ సెయింట్ పాల్, లిటిల్ ఫ్లవర్ స్కూల్లో జరిగింది. నిజాం కాలేజీలో డిగ్రీ చదివారు. ఉస్మానియా యూనివర్సిటీలో పీజీ చేశారు. అనంతరం సివిల్స్ రాసి ఐపీఎస్లో చేరారు. 1999 బ్యాచ్కు చెందిన స్టీఫెన్ రవీంద్ర ఉమ్మడి వరంగల్ జిల్లాలో పరకాల అసిస్టెంట్ సూపరింటెండెంట్ ఆఫ్ పోలీస్గా మొదటిసారి పదవీ బాధ్యతలు చేపట్టారు. అనంతరం అదిలాబాద్ అడిషనల్ ఎస్పీగా 2004 వరకు పని చేశారు. 2004లో వరంగల్ ఎస్పీగా విధులు నిర్వర్తించారు. అనంతపురం ఎస్పీగా పని చేసిన సమయంలో ఫ్యాక్షనిజంపై ఉక్కుపాదం మోపారు.
డ్రగ్ మాఫియాకు చుక్కలు
2008 నుంచి 2009 వరకు దివంగత మాజీ సీఎం వైఎస్సార్ సీఎస్ఓగా పని చేశారు. ఆ సమయంలో వైఎస్ కుటుంబానికి సన్నిహితంగా ఉండేవారు. కరీంనగర్ ఎస్పీగా, ఈస్ట్ జోన్ డీసీపీ, వెస్ట్ జోన్ డీసీపీగా పని చేశారు. వెస్ట్ జోన్ డీసీపీగా డ్రగ్ మాఫియాపై విరుచుకుపడ్డారు. గ్రేహైండ్స్ గ్రైప్ కమాండర్గా, సైబరాబాద్ జాయింట్ కమిషనర్గా పనిచేశారు. అదిలాబాద్, వరంగల్లో పనిచేసినపుడు మావోయిస్టుల అణచివేతలో సమర్థవంతంగా పనిచేశారు.
మళ్లీ వాళ్లిద్దరూ కలిసే..
వరంగల్ ఎస్పీగా పనిచేసినపుడు గౌతమ్ సావాంగ్ వరంగల్ డీఐజీగా పని చేసేవారు. ఆయన సూచనలతో మావోయిస్టుల ఎత్తులకు పైఎత్తులు వేశారు. ప్రస్తుతం ఏపీకీ నూతన డీజీపీగా గౌతమ్ సావాంగ్ పేరు తెరపైకి రావటం .. ఇంటెలిజెన్స్ చీఫ్గా స్టీఫెన్ రవీంద్ర పేరు బహిర్గతం కావటం పోలీస్ వర్గాల్లో చర్చనీయాంశమైంది.
