పోలవరం ప్రాజెక్టు వ్యయం అంచనా పెంచుకుంటూ పోవడమే తప్ప తెదేపా ప్రభుత్వం చేసిందేమీ లేదని జలవనరుల శాఖ మంత్రి అనిల్ కుమార్ యాదవ్ ఆరోపించారు. శిలాఫలకాలు వేసి ఫొటోలు తీసుకుంటూ కాలక్షేపం చేశారని... ప్రాజెక్టు పూర్తిచేద్దామన్న ధ్యాస లేకపోయిందని మండిపడ్డారు. పోలవరం ప్రాజెక్టు పనులు ఏమాత్రం జరిగాయో చర్చించాలని డిమాండ్ చేశారు. పోలవరం పూర్తి చేసినట్లు గొప్పగా అందర్నీ అక్కడికి తీసుకెళ్లి ఫొటోలు దిగారని ఎద్దేవా చేశారు.
లక్షల కుటుంబాలు ఇబ్బందిపడుతుంటే ఏమాత్రం పట్టించుకోలేదని ధ్వజమెత్తారు. వారందరికీ న్యాయం చేయాల్సిన అవసరం ఉందన్నారు. డబ్బులు లేకపోయినా రాష్ట్ర ప్రయోజనాల కోసం తీవ్రంగా కష్టపడ్డానని గొప్పలు చెప్పారని అనిల్ కుమార్ నిప్పులు చెరిగారు. వాళ్ల మనుషుల కోసం ప్రాజెక్టు వ్యయం పెంచుకుంటూ పోయారని విమర్శించారు.
ఆర్‌అండ్‌ఆర్‌కు సంబంధించి ఒక అధికారిని ఏర్పాటు చేయాలని సీఎం జగన్ చెప్పారని మంత్రి వెల్లడించారు. పోలవరం ప్రాజెక్టు పూర్తిచేసే ఘనత జగన్కే దక్కుతుందని... నిర్ణీత కాలంలో పోలవరం ప్రాజెక్టు పూర్తి చేస్తామని మంత్రి ధీమా వ్యక్తం చేశారు.
ఈ అంశంపై స్పందిస్తూ ప్రతిపక్షనేత చంద్రబాబు పోలవరంపై చర్చ జరిగితే అన్ని విషయాలు బయటకొస్తాయన్నారు. కేంద్రం నుంచి నిధులు రాని పరిస్థితి నెలకొందన్నారు. ప్రాజెక్టు పనులను సీడబ్ల్యూసీ, కేంద్రం పర్యవేక్షించాయని వెల్లడించారు.
