తమ గ్రామంలో మద్యం దుకాణం వద్దంటూ అనంతపురం జిల్లా రాప్తాడులో మహిళలు నిరసనకు దిగారు. అనంతపురం నగరంలో కరోనా కేసులు ఎక్కువగా ఉన్న కారణంగా మద్యం దుకాణాలను తెరవలేదు. దీంతో మందుబాబులు అనంతపురం నగరం పక్కనే ఉన్న రాప్తాడుకు వెళ్తున్నారు. అక్కడున్న మద్యం దుకాణం వద్ద రోజు వందలాది మంది క్యూలైన్లలో నిల్చుని కనిపిస్తున్నారు. అంతే కాకుండా ఆ పరిసరాల్లోనే తిరుగుతున్నారు.
కరోనా విజృంభిస్తుండటంతో... ఎక్కడినుంచో వచ్చినవారు తమ గ్రామానికి వచ్చి వైరస్ వ్యాప్తి చేస్తున్నారని మహిళలు మండిపడుతున్నారు. ఇళ్ల మధ్యనే ఇలాంటి పరిస్థితి ఉంటే మహిళలు, పిల్లల పరిస్థితి ఏంటని నిలదీశారు. మద్యం దుకాణాన్ని తొలగించాలని డిమాండ్ చేశారు.
విషయం తెలుసుకున్న పోలీసులు అక్కడి చేరుకుని మహిళలతో మాట్లాడారు. విషయాన్ని ఉన్నతాధికారుల దృష్టికి తీసుకెళ్లి మద్యం దుకాణంపై నిర్ణయం తీసుకుంటామని చెప్పడంతో వారు ఆందోళనను విరమించారు.
