దొంగలు వచ్చారు..జాగ్రత్త!

కరోనా విధుల్లో పోలీసులు నిమగ్నమైన వేళ దొంగలు చేతివాటం చూపుతున్నారు. తాళాలు వేసిన ఇళ్లే లక్ష్యంగా చోరీలకు పాల్పడుతున్నారు. అనంతపురం జిల్లాలో దొంగతనం కేసులు ఇటీవల ఎక్కువగా నమోదవుతున్నాయి. లాక్​డౌన్ కారణంగా ఉపాధి లేకపోవడం వలన పాత నేరస్తులే దొంగతనాలకు పాల్పడుతున్నట్లు పోలీసులు గుర్తించారు.

పోలీసులు కరోనా నియంత్రణ విధుల్లో నిమగ్నమయ్యారు. లాక్‌డౌన్‌ నిబంధనల అమలుకు కృషి చేస్తున్నారు. ఇప్పటికే అనంతపురం జిల్లాలో 217 మంది పోలీసులు కరోనా బారిన పడ్డారు. వీరితో ప్రాథమిక కాంట్రాక్టు ఉన్న పోలీసులు హోమ్‌ క్వారంటైన్‌లో ఉన్నారు. దీన్ని దృష్టిలో ఉంచుకుని దొంగలు విజృంభిస్తున్నారు. జిల్లాలో చోరీలకు పాల్పడుతున్నారు. అనంతపురం పొరుగు జిల్లాల్లోకి ఉత్తరాది రాష్ట్రాల ముఠాలు ప్రవేశించాయి. ప్రజలు అప్రమత్తంగా ఉండాల్సిన అవసరం ఎంతైనా ఉంది. నగర, పట్టణాల్లో సీసీ కెమెరాలు ఉండటంతో ప్రధాన రహదారులపై నిఘా ఉంది. దీంతో శివారు ప్రాంతాలపై దొంగలు దృష్టి సారించారు.

• ఆర్థిక ఇబ్బందులే..

కరోనా నేపథ్యంలో ఆర్థిక ఇబ్బందులు మొదలయ్యాయి. అన్ని వర్గాలు బాగా చితికిపోతున్నాయి. గతంలో పాత నేరస్థులు కూలీ పనులు చేస్తూ.. జీవించేవారు. ప్రస్తుతం పనులు లేక వారు ఆర్థిక ఇబ్బందులతో చోరీల బాట పట్టే అవకాశాలున్నాయని నిఘా వర్గాలు హెచ్చరిస్తున్నాయి. గతంలో చోరీల నియంత్రణకు ‘'ఒక దొంగ- ఒక పోలీసు'’ కార్యక్రమాన్ని చేపట్టారు. దీంతో జిల్లాలో చోరీలు తగ్గాయి. కరోనా నేపథ్యంలో పోలీసులు ఆ కార్యక్రమాన్ని పక్కన పెట్టేశారు.

• పాత నేరస్తులే..

జిల్లాలో పాత దొంగలు 2,250 మంది ఉన్నట్లు గతంలో పోలీసులు గుర్తించారు. అప్పట్లో దొంగలను సంస్కరించడానికి పోలీసులకు బాధ్యత అప్పగించారు. సంబంధిత పోలీసు దొంగపై నిఘా ఉంచి, ఉపాధి అవకాశాలు కల్పించేవారు. ప్రస్తుతం పాత దొంగలు తిరిగి నేరాలకు పాల్పడుతున్నట్లు సమాచారం. అనంతపురం టీవీ టవర్, గుంతకల్లు భాగ్యనగర్‌కు చెందిన షికారీ పాత ముఠాలు చోరీల వైపు మళ్లుతున్నట్లు తెలుస్తోంది. మరోవైపు సైబర్‌ నేరాలు పెరుగుతున్నాయి. ఏటీఎం కార్డు నంబరు చెప్పండి, ఓటీపీ చెప్పాలని అడుగుతున్నారు. వీటిపైనా ప్రజలు అప్రమత్తంగా ఉండాలని పోలీసులు సూచిస్తున్నారు.

• చోరీల తీరిది..

పగటి పూట ఇళ్ల చోరీలు మార్చి, ఏప్రిల్‌ నెలల్లో ఒక్కటీ లేదు. మే నెలలో 2 కేసులు నమోదయ్యాయి. రాత్రి పూట ఇళ్ల చోరీలు మార్చిలో 7, ఏప్రిల్‌లో 2, మే నెలలో 6 నమోదయ్యాయి. సాధారణ చోరీలు మార్చిలో 26, ఏప్రిల్‌లో 3, మే నెలలో 20 నమోదయ్యాయి. వీటిని బట్టి పరిశీలిస్తే లాక్‌డౌన్‌ తొలినాళ్లలో చోరీలు కొంత తగ్గినా.. మళ్లీ మొదలైనట్లు తెలుస్తోంది.

• తాళం వేస్తే ప్రమాదమే

కరోనాతో ఉపాధి కోల్పోయిన కొందరు నగర, పట్టణవాసులు పల్లెబాట పట్టారు. ఇళ్లకు తాళాలు వేసి పల్లెలకు వెళుతున్నారు. పట్టణాల్లో వైరస్‌ విజృంభిస్తుండటంతో ఉద్యోగులు తమ కుటుంబ సభ్యులను పల్లెలకు పంపుతున్నారు. ఈక్రమంలో ఇళ్లకు సీసీ కెమెరాలు ఏర్పాటు చేసుకోవడం మంచిదని పోలీసులు చెబుతున్నారు. సీసీ కెమెరా ఉన్న పరిసర ప్రాంతాల్లో చీకటి లేకుండా వెలుతురు ఉండేలా చూసుకోవాలి. తాళం వేసి ఊరెళ్లే సందర్భంలో పొరుగు వారిని అప్రమత్తం చేయడం మంచిది.

ఇవీ చదవండి...