Petrol Attack on Couple: దారుణం.. మద్యం తాగొద్దన్నందుకు పెట్రోల్ పోసి నిప్పంటించాడు

Petrol Attack on Couple: నిత్యం మద్యం తాగుతున్నాడని, భార్యను ఇబ్బందులు పెడ్డుతున్నాడని.. అతని బంధువులు మందలించారు. దీంతో కక్ష పెంచుకున్న అతను.. వరసకు అన్న, వదిన అయ్యే వారిపై పెట్రోలు పోసి నిప్పు పెట్టాడు. ఈ ఘటనలో ఆ దంపతులిద్దరూ తీవ్రంగా గాయపడ్డారు. ఇది ఎక్కడ జరిగిందంటే..?

Petrol Attack on Couple: అనంతపురం జిల్లా తాడిపత్రిలో దారుణం చోటు చేసుకుంది. మద్యానికి బానిసైన ఓ వ్యక్తిని తాగొద్దని చెప్పినందుకు.. పెట్రోల్ పోసి నిప్పు పెట్టాడు. ఈ ఘటన చుక్కలూరు పారిశ్రామిక వాడలో చోటు చేసుకుంది. పారిశ్రామిక వాడలోని శ్రీనిధి నల్ల బండల పాలిష్ పరిశ్రమలో నల్లపురెడ్డి, కృష్ణవేణి దంపతులు కూలీ పనులు చేసుకుంటూ జీవనం సాగిస్తున్నారు. ఇదే ఫ్యాక్టరీలో రమేష్ రెడ్డి కూడా పని చేస్తున్నాడు. తాడిపత్రికి చెందిన నల్లపురెడ్డి, రమేష్ రెడ్డి దగ్గరి బంధువులు. వరసకు అన్నదమ్ములు అవుతారు. కాగా రమేష్ రెడ్డి నిత్యం మద్యం సేవించి వచ్చి.. తన భార్యతో గొడవ పడేవాడు. దీంతో మద్యం తాగొద్దని రమేష్ రెడ్డిని నల్లపురెడ్డి మందలించాడు. దీంతో నల్లపురెడ్డిపై రమేష్​రెడ్డి కక్ష పెంచుకున్నాడు.

శనివారం రాత్రి పరిశ్రమ ఆవరణలో మంచంపై అంతా నిద్రిస్తున్నారు. అదే ఫ్యాక్టరీలో పని చేసే మల్లికార్జున అనే వ్యక్తి కుమార్తె కూడా వీరి పక్కనే మంచం వేసుకుని నిద్రిస్తోంది. అర్ధరాత్రి సమయంలో రమేష్ రెడ్డి.. నల్లపురెడ్డి, కృష్ణవేణిపై పెట్రోల్ పోశాడు. వెంటనే మెలకువ వచ్చిన కృష్ణవేణి ఏం చేస్తున్నావ్ అని అడిగేలోగా రమేష్ రెడ్డి నిప్పు అంటించాడని వారు తెలిపారు.

ఈ ఘటనలో దంపతులు ఇద్దరికీ తీవ్ర గాయలయ్యాయి. పక్కనే నిద్రిస్తున్న బాలికకు కూడా మంటలు అంటుకుని చేతులు కాలాయి. తాగుడుకు బానిసైన రమేష్ రెడ్డిని రెండు రోజుల క్రితం తాము పద్ధతి మార్చుకోవాలని దండించామని.. అది మనసులో ఉంచుకుని ఇలా చేశాడని నల్లపురెడ్డి, కృష్ణవేణి దంపతులు రూరల్ ఎస్ఐ గౌస్ మహ్మద్​కు వివరించారు. వారి ఫిర్యాదు మేరకు రూరల్ ఎస్ఐ కేసు నమోదు చేసుకున్నారు.

కృష్ణవేణి, నల్లపురెడ్డి పరిస్థితి విషమంగా ఉండటంతో అనంతపురం సర్వజన ఆసుపత్రికి తరలించారు. తర్వాత మెరుగైన వైద్యం కోసం కర్నూలుకు తరలించారు. స్వల్ప గాయాలైన బాలికను తాడిపత్రి ఆసుపత్రిలోనే చికిత్స అందించి ఇంటికి పంపించారు. దీనిపై తాడిపత్రి రూరల్ పోలీసులు కేసు నమోదు చేసుకొని దర్యాప్తు చేస్తున్నారు.

"రాత్రి అందరూ పడుకున్నారు. పెట్రోల్ పోసి.. నిప్పు అంటించి పారిపోయాడు. మద్యం తాగొద్దని చెప్పాడు. అలా చెప్పినందుకు రాత్రి అలా చేశాడు". - స్థానికుడు

"అతను ఎప్పుడూ తాగి భార్యను కొట్టేవాడు. వీళ్లు అడ్డు పడేవాళ్లు. నాకు అడ్డుపడతారా అని వారిపై కక్ష పెట్టుకున్నాడు. అందుకే రాత్రి అలా చేశాడు". - స్థానికురాలు

పోలీసులు నిర్లక్ష్యంగా వ్యవహరించారని ఆత్మహత్యాయత్నం: అనంతపురం జిల్లా కళ్యాణదుర్గం మండలం మోరేపల్లి గ్రామానికి చెందిన రాజప్ప అనే వ్యక్తి ఆత్మహత్యాయత్నానికి పాల్పడ్డాడు. రాజప్ప ఇంటి పక్కన నివాసముంటున్న వైసీపీ సానుభూతి పరులైన కొంతమంది.. తమను మాటలతో వేధిస్తున్నారని అన్నారు. ఈ విషయాన్ని పోలీసులకు ఫిర్యాదు చేయడానికి వస్తే.. పోలీసులు కూడా అసభ్య పదజాలాన్ని ఉపయోగించారని రాజప్ప ఆవేదన వ్యక్తం చేస్తున్నాడు. దీంతో తీవ్ర మనస్తాపానికి గురై.. ఆత్మహత్యాయత్నానికి పాల్పడ్డాడు. దీంతో అతడిని ఆసుపత్రిలో చేర్చి.. చికిత్స అందిస్తున్నారు.

గ్రామంలో.. టీడీపీ తరఫున ఎనిమిదో వార్డుకు పోటీ చేసి గెలిచిన తమను చీటికిమాటికి బండ బూతులు మాట్లాడుతూ వేధిస్తున్నారని ఈ విషయం కళ్యాణదుర్గం రూరల్ పోలీసులకు ఫిర్యాదు చేయడానికి వస్తే పోలీస్ అధికారులు కూడా అసభ్య పదజాలంతో తమను మందలించారని రాజప్ప ఆవేదన వ్యక్తం చేస్తున్నాడు. పాల్పడగా కళ్యాణదుర్గం ప్రభుత్వ ఆసుపత్రిలో చేర్చి చికిత్స అందించారు. ప్రస్తుతం ఆయన ఆరోగ్యం నిలకడగా ఉంది.