తల్లి ఓడింది కానీ.. తన ప్రేమ గెలిచింది..

అమ్మ.. అనిర్వచనీయమైన ప్రేమకు చిరునామా. ఏ జాతిలోనైనా తల్లిని మించిన వ్యక్తి మరొకరు ఉండరు. తన బిడ్డలను కాపాడుకోవడం కోసం తన ప్రాణాలను సైతం పణంగా పెడుతుంది తల్లి. ఇలాంటి ఓ ఘటనే అనంతపురం జిల్లాలో జరిగింది. తన పిల్లను కుక్కల బారి నుంచి కాపాడి తాను ప్రాణాలు విడిచింది ఓ వానరం.

అనంతపురం జిల్లా తాడిపత్రిలో ఓ వానరం తన పిల్లతో కలిసి ప్రధాన రహదారిపైకి వచ్చింది. వాటిని చూసిన మూడు శునకాలు దాడికి ప్రయత్నించాయి. తన బిడ్డను ఎలాగైనా వాటినుంచి కాపాడాలనే ఉద్దేశంతో తల్లి వానరం ఆ కుక్కలపై ఎదురుదాడికి దిగింది. ఈ ఘర్షణలో తల్లి వానరం మృతిచెందగా.. పిల్ల కోతి ప్రాణాలు నిలిచాయి.

బిడ్డను రక్షించడానికి తన ప్రాణాలు కోల్పోయిన తల్లి కోతిని చూసి స్థానికులు విచారం వ్యక్తం చేశారు. ఆ వానరానికి సాంప్రదాయబద్ధంగా దహన సంస్కారాలు నిర్వహించారు.

ఇవీ చదవండి...