ఖరీఫ్కు ముందే ఈ ఏడాది పుష్కలంగా వర్షాలు కురిశాయి. కరవుసీమ రాయలసీమలోనూ జోరు వానలతో చెరువులు, కుంటలు పూర్తిస్థాయిలో నిండాయి. అనంతపురం జిల్లాలో హెచ్ఎల్సీ, హంద్రీనీవా కాలువ కింద 210 వరకు చెరువులు, కుంటలు పూర్తిగా నింపారు. ఎటు చూసినా చెరువులు నిండుకుండను తలపిస్తున్నా.. జిల్లాలో 80 వేల హెక్టార్లలో రైతులు పంటలు సాగు చేయకుండా భూమిని ఖాళీగా వదిలేశారు. తీవ్ర వర్షాభావ పరిస్థితుల్లోనూ ఎన్నో ఒడుదొడుకులను ఎదుర్కొని భూమి తల్లినే నమ్ముకున్న రైతన్న ఇక పోరు చేయలేక అలసిపోయాడు. ఏటికేడు పెరుగుతున్న అప్పులతో పంటకు విరామమిచ్చాడు. అనంతపురం జిల్లాలో పరిస్థితులపై హైదరాబాద్‌ కేంద్రీయ విశ్వవిద్యాలయం ఆచార్యుడు పురేంద్ర ప్రసాద్ ఆధ్వర్యంలో నిర్వహించిన సర్వేలో విస్తుగొలిపే నిజాలు వెలుగుచూశాయి.
జిల్లావ్యాప్తంగా 77 గ్రామాల్లో 450 మందికి పైగా రైతులను కలిసిన సర్వే ప్రతినిధులు పంట వేయకపోవడానికి కారణాలను అడిగి తెలుసుకున్నారు. ప్రకృతిని ఎదురించి సాధించిన పంట దిగుబడులకు మద్దతు ధర లభించడం లేదని వారు వాపోయారు. పైగా పెట్టుబడులు రెట్టింపవ్వడంతో కనీసం ఆ సొమ్ము కూడా దక్కడం లేదన్నారు. ప్రభుత్వం నుంచి ఎలాంటి సహాయ సహకారాలు అందకపోవడం వల్లే ఈసారి పంటలు వేయకుండా భూములు వదిలేసినట్లు తెలిపారు.
అనంతపురం జిల్లా అంటేనే వేరుశనగ పంట గుర్తుకొస్తుంది. అలాంటిది ఈసారి వేరుశనగ విస్తీర్ణం సాధారణం కన్నా గణనీయంగా తగ్గింది. కొంతమంది రైతులు పశువుల మేత కోసం పంట వేయగా.. మరికొందరు పరువు కోసం పంట వేస్తున్నట్లు సర్వేలో చెప్పారు. పరిస్థితులు ఈ విధంగా కొనసాగితే భవిష్యత్‌లో వ్యవసాయం పూర్తిగా కనుమరుగయ్యే ప్రమాదముందని స్థానికులు ఆవేదన వ్యక్తం చేస్తున్నారు. వ్యవసాయరంగ నిపుణులు, మేధావులు, రైతుల అభిప్రాయాలతో రూపొందించిన సర్వే నివేదికను సెంట్రల్ వర్సిటీ ఆచార్యులు పురేంద్ర త్వరలోనే ప్రభుత్వానికి అందజేయనున్నారు.
ఇవీచదవండి.
