అనంతపురం జిల్లాలో కరోనా వైరస్ విజృంభిస్తోంది. రోజూ వందల మంది వైరస్ బారిన పడుతున్నారు. ఖరీఫ్ పంట రుణాల వితరణ, పాత రుణాల రెన్యూవల్ కోసం రోజూ గ్రామీణ బ్యాంకు శాఖల వద్దకు పెద్దఎత్తున రైతులు, ఖాతాదారులు వస్తుండటంతో బ్యాంకుల్లోని సిబ్బంది వైరస్ బారిన పడుతున్నారు. పలు బ్యాంకుల్లో ఖాతాదారులను కట్టడి చేసి భౌతిక దూరం పాటిస్తూ చర్యలు తీసుకోవటంలో బ్యాంకు మేనేజర్లూ చొరవ తీసుకోవటంలేదు.
అనంతపురం జిల్లా వ్యాప్తంగా 29 బ్యాంకులకు సంబంధించి, 482 శాఖలుండగా, ఇప్పటికే 21 చోట్ల బ్యాంకు శాఖలు మూతపడ్డాయి. పలు మండలాల్లో పది రోజులకు పైగా బ్యాంకులను తెరవటంలేదు. గుత్తిలో ఒకే భవనంలో యూనియన్ బ్యాంకు, ఎస్బీఐ శాఖలున్నాయి. యూనియన్ బ్యాంకు సిబ్బందికి వైరస్ పాజిటివ్ రావటంతో ఆ భవనంలోని రెండు బ్రాంచీలను మూసివేశారు. ధర్మవరంలో రెండు ఎస్బీఐ ప్రధానశాఖలతోపాటు, కళాజ్యోతి కూడలిలోని శాఖనూ మూసేశారు. తాడిపత్రిలో ఎస్బీఐ ప్రధానశాఖను పదిరోజుల క్రితమే మూసేశారు, సిబ్బంది విధులకు రావటానికే భయపడుతుండటంతో ఎప్పుడు ఆ శాఖను తెరుస్తారో తెలియక ఖాతాదారులు రోజూ వచ్చి వెను తిరిగిపోతున్నారు. గ్రామీణ ప్రాంతాల్లో విశేష సేవలందించే ఆంధ్రప్రగతి గ్రామీణ బ్యాంకుల శాఖల్లోనూ సిబ్బందికి వైరస్ సోకి పలు చోట్ల మూతపడ్డాయి.
జిల్లా వ్యాప్తంగా మంచి వర్షాలు కురుస్తుండటంతో రైతులు ఖరీఫ్ పంట రుణాల కోసం ఎదురు చూస్తున్నారు. మరికొందరు రైతులు దీర్ఘకాలిక రుణాలు తీసుకొని వ్యవసాయ యంత్ర పరికరాలు కొనుగోలుచేయటానికి వేసుకున్న ప్రణాళికలన్నీ తారుమారవుతున్నాయి.
ఇదీ చదవండి: ఇకపై గ్రూప్ పాలసీగా కరోనా కవచ్
