భూమిపూజ చేసిన ఈ ప్రాజెక్టులను రెండేళ్లలో పూర్తిచేసి ఫలాలు అందిస్తామని అనంతపురం జిల్లా ఇంఛార్జి మంత్రి బొత్స సత్యనారాయణ చెప్పారు. అనంతపురం జిల్లాలో కొత్తగా నిర్మించనున్న మూడు జలాశయాలను సీకే పల్లి మండలం వెంకటాంపల్లి సభ వద్ద ముఖ్యమంత్రి జగన్మోహన్ రెడ్డి వీక్షణ సమావేశం ద్వారా భూమిపూజ నిర్వహించారు. ఈ సందర్భంగా మంత్రి బొత్స సత్యనారాయణ మాట్లాడుతూ... గత ప్రభుత్వం రెండు జలాశయాల నిర్మాణానికి డీపీఆర్ తయారు చేయటానికే రూ.16 కోట్లు ఖర్చుచేసి, పనులు మాత్రం చేయలేదన్నారు. గతంలో నిర్ణయించిన 800 కోట్ల రూపాయలతోనే తాము నాలుగు ప్రాజెక్టులు నిర్మిస్తున్నట్లు ఆయన తెలిపారు.
ఈ ప్రాజెక్టుల ద్వారా రాప్తాడు నియోజకవర్గంలో 75వేల ఎకరాలకు సాగునీరొస్తుందని మంత్రి బొత్స అన్నారు. ప్రతి ఇంటా సిరులు కురిపించేలా పాడిపరిశ్రమను అభివృద్ధి చేస్తున్నట్లు పశుసంవర్థకశాఖ మంత్రి అప్పలరాజు చెప్పారు. ఈ నాలుగు జలాశయాలు అందుబాటులోకి వస్తే ఐదు వేల మంది మత్స్యకారులకు ప్రత్యక్ష ఉపాధి దొరకనుందని తెలిపారు. ప్రస్తుతం 12 మత్స్యకార సహకార సంఘాలుండగా... భవిష్యత్లో ఈ నియోజకవర్గంలో మరో 40 సంఘాలు ఏర్పాటు చేస్తామన్నారు. ఎగువ పెన్నార్ జలాశయానికి వైఎస్ఆర్ అప్పర్ పెన్నార్ రిజర్వాయర్గా పేరు పెడుతూ.. వీక్షణ సమావేశంలో సీఎం జగన్ జీవోను విడుదల చేశారు.
ఇదీ చదవండీ... హంద్రీనీవా సుజల స్రవంతితో అనంతపురం జిల్లా సస్యశ్యామలం: జగన్
